საზოგადოება
თბილისის მეტრო, შესაძლოა, 3 მაისს გაჩერდეს
მეტროში არსებული ალტერნატიული პროფკავშირი - “ერთობა 2013” მეტროს სადგურ „რუსთაველთან“ პრესკონფერენციას მართავს.
პროფკავშირის ცნობით, გარდა სიტუაციის მიმოხილვისა, ისინი საჯაროდ დააანონსებენ გაფიცვის თარიღს და მოსახლეობას ფლაერების საშუალებით გააცნობენ ქალაქის შესაძლო პარალიზების დროს. პროფკავშირი შრომის, ჯანდაცვისა და სოციალური დაცვის სამინისტროში განცხადებასაც შეიტანს, რათა კანონიერი გაფიცვის შესაბამისი ყველა პროცედურა დაიცვან,
„ერთობა 2013“ მეტროს მემანქანეთა თითქმის სრულ უმრავლესობას მოიცავს, შესაბამისად, გაფიცვის დაწყების შემთხვევაში, დაიკეტება ყველა მეტროს სადგური. მოგეხსენებათ, მეტროში მედიაციის პროცესი ფაქტობრივად დასრულდა. სამმხრივი შეხვედრების შემდეგ, სატრანსპორტო კომპანიისა და მერიისგან პასუხი ერთია - ხელფასების მატება ვერ მოხდება! „ერთობა 2013“-ის წევრებს სხვა აღარაფერი დარჩათ, გარდა გაფიცვისა.
ხელფასების მატება მეტროში 2013 წლიდან არ მომხდარა. მემანქანეების მოთხოვნა, საათობრივი ანაზღაურების 7 ლარიდან 10 ლარამდე გაზრდაზე, გამოწვეულია ქვეყანაში არსებული მძიმე ეკონომიკური ფონითა და მეტროში არსებული მძიმე სამუშაო პირობებით“- აცხადებს “ერთობა 2013”.
მეტროს თანამშრომლები ამბობენ, რომ უკან დახევას არ აპირებენ, რადგან 2016 წლიდან კომპანიისგან მხოლოდ დაპირებებს იღებენ.
თბილისის მეტრო, შესაძლოა, 3 მაისს გაჩერდეს.
ცირა გურგენიძე