მოზაიკა

თბილისის რიგითი 26-ე ჯაზფესტივალი გაიხსნა

თბილისში, სასტუმრო "შერატონ გრანდ მეტეხი პალასში" თბილისის რიგით 26-ე ჯაზფესტივალი გაიხსნა. ღონისძიების ორგანიზატორები არიან: კომპანია "ისთერნ პრომოუშენსი" და "თიბისი კონცეპტი".

9 მაისის საღამოს ჯაზფესტივალის კონცერტების სერია ლუკა თოფურიამ და მისმა ბენდმა გახსნეს. მოგვიანებით კი მსმენელის წინაშე "Jazz/Takes Supergroup" და მისი 4 გამორჩეული შემსრულებელი: ბილ ევანსი, ნილს ლან დოკი, ფელიქს პასტორიუსი და მეისონ ჰარვეი წარდგნენ.

10 მაისს მუსიკალურ საღამოს ჩეხი პიანისტი მარტინ კრატოჩვილი და მისი ბენდი "Jazz Q" გახსნიან. მოგვიანებით კი სცენას ცნობილი იტალიელი პიანისტის, ანტონიო ფარაოს ჯაზ-ტრიო დაიკავებს.

ღონისძიების დასკვნით დღეს, 11 მაისს, იტალიური ბენდი "Motel Kaiju" დაუკრავს. საღამოს კი ჯაზის ცოცხალი ლეგენდა, "გრემის" ჯილდოს ოთხგზის მფლობელი სტენლი კლარკი თავისი პერფორმანსით დახურავს.

როგორც "მედიანიუსს" "ისთერნ პრომოუშენსის" დამფუძნებელმა მიხეილ გიორგაძემ განუცხადა, ასეთი მასშტაბის, ხარისხის, უწყვეტი ტრადიციის მქონე ღონისძიების ჩატარება ქვეყნის იმიჯისათვის მეტად მნიშვნელოვანია.

"ეს არის გზავნილი მთელი მსოფლიოსათვის, რომ საქართველოში საკმაოდ უსაფრთხო, სტაბილური გარემოა შექმნილი და სათანადო ინფრასტრუქტურაა განვითარებული საიმისოდ, რომ მსგავსი დონის კულტურულ ღონისძიებებს ვუმასპინძლოთ", -- აღნიშნა მიხეილ გიორგაძემ.