საზოგადოება
`თბილისის თამბაქოს` თანამშრომლებმა საერთაშორისო სავაჭრო პალატასთან საპროტესტო აქცია გამართეს
სააქციო საზოგადოება "თბილისის თამბაქოს" თანამშრომლებმა საერთაშორისო სავაჭრო პალატასთან საპროტესტო აქცია გამართეს.
აქციის მონაწილეთა განცხადებით, საერთაშორისო სავაჭრო პალატის თავმჯდომარის, ფადი ასლის და თამბაქოს არაკეთილსინდისიერ იმპორტიორებს ქართული წარმოების განადგურება სურთ.
საპროტესტო აქცია - "არა ასლის ასლებს" გაიმართა "ევროპული საქართველოს" სათავო ოფისთანაც.
,,კომპანია არაერთხელ აფრთხილებდა მულტინაციონალურ კომპანიებს, რომლებიც მუშაობენ საქართველოში, რომ ისინი არღვევენ საქართველოს კანონს თამბაქოს კონტროლის შესახებ. აღნიშნული კანონის მეხუთე მუხლში შავით თეთრზე წერია, რომ საქართველოს მთელ ტერიტორიაზე იკრძალება თამბაქოს პროდუქციის რეალიზაცია თვითღირებულებად ან თვითღირებულაზე უფრო დაბალ ფასად. გამომდინარე იქიდან, რომ ისინი ამდენი წლის განმავლობაში ამ კანონს არღვევდნენ, ჩვენ მოგვადგა გამოუსწორებელი ფინანსური ზიანი. ჩვენ გავხდით იძულებული, რომ მიგვემართა სასამართლოსთვის და დაგვეცვა ჩვენი ინტერესები’’, - განუცხადა ჟურნალისტებს ,,თბილისის თამბაქოს წარმომადგენელმა, ზვიად მუკბანიანმა.
საერთაშორისო სავაჭრო პალატის (ICC) თავმჯდომარის, ფადი ასლის განცხადებით, თბილისის საქალაქო სასამართლოს მოსამართლე ვლადიმერ კაკაბაძე, რომელმაც Philip Morris-ი და British American Tobacco დააჯარიმა, კორუმპირებულია.
"დღეს ICC-ის ოფისი დაიკეტება რამდენიმე კორუმპირებული მოსამართლის მიმართ პროტესტის ნიშნად, " - ასეთი შინარსის წარწერაა გამოკრულია საერთაშორისო სავაჭრო პალატის ოფისთან.
თავის მხრივ, თბილისის საქალაქო სასამართლო მოუწოდებს ფადი ასლის, დარჩეს სამართლებრივ სივრცეში და ნაცვლად დეზინფორმაციული ხასიათის განცხადებებისა, დაელოდოს ზემდგომი ინსტანციის გადაწყვეტილებებს, ასევე - თავი შეიკავოს მსგავსი განცხადებებისგან.
ნინო ექვთიმიშვილი