მოზაიკა

თბილისის 26-ე ჯაზფესტივალი სტენლი კლარკის კონცერტით დაიხურა

თბილისის რიგით 26-ე ჯაზფესტივალი ჯაზის ცოცხალი ლეგენდის, ბასისტ სტენლი კლარკის კონცერტით დაიხურა.

ღონისძიებას 9-11 მაისს სასტუმრო "შერატონ გრანდ მეტეხი პალასი" მასპინძლობდა. მისი ორგანიზატორები კი კომპანია "ისთერნ პრომოუშენსი" და "თიბისი კონცეპტი" იყვნენ.

ქართველი მსმენელის წინაშე, ტრადიციულად, მსოფლიოში აღიარებული ვარსკვლავები წარდგნენ. ღონისძიების კულმინაცია 4 "გრემის" მფლობელის. სტენლი კლარკის პერფორმანსი გახდა. მან ბენდსა და ქართველ პიანისტ ბექა გოჩიაშვილთან ერთად დაუკრა.

მუსიკოსი საქართველოში რამდენჯერმეა ნამყოფი. როგორც მან ჟურნალისტებთან საუბრისას აღნიშნა, ჩვენს ქვეყანაში თავს შინაურულად გრძნობს.

"მსოფლიოში ცოტაა ისეთი ადგილი, სადაც აუდიტორია ისე გაგრძნობინებს თავს, თითქოს საკუთარ სახლში იყო. აქ ჩამოსვლა ამიტომაც მიყვარს. ბედნიერი ვარ, რომ კიდევ ერთხელ მომეცა საშუალება, ქართველი მაყურებლისათვის დამეკრა და სცენაზე ბექასთან ერთად ვმდგარიყავი", -- აღნიშნა სტენლი კლარკმა.

ღონისძიებამ, რომელსაც საქართველოში აშშ-ის საგანგებო და სრულუფლებიანი ელჩი კელი დეგნანი ესწრებოდა, მაყურებლის განსაკუთრებული მოწონება დაიმსახურა. როგორც მათ აღნიშნეს, საქართველოში სტენლი კლარკის მოსმენას მომავალშიც ისურვებდნენ.