საზოგადოება

თბილისისთვის ყველაზე მნიშვნელოვანია, რკინიგზის მონაკვეთი შემოვლით გზაზე განთავსდეს - მამუკა სალუქვაძე

,,სითი ინსტიტუტი - საქართველოს“ ხელმძღვანელის მამუკა სალუქვაძის განცხადებით, თბილისის განვითარების გენერალური გეგმის კონცეფცია დედაქალაქის მერიას უკვე წარედგინა და მასში სამი ძირითადი საკითხია პრიორიტეტული - მშენებლობაზე გაცემული ნებართვები, რკინიგზის მონაკვეთის შემოვლით გზაზე გადატანა და ქალაქის ცენტრის განტვირთვა.

,,მიწათმშენებლობის გენერალურ გეგმაზე მუშაობა მიდის გრაფიკის მიხედვით. ჩვენი მიზანია ქალაქი იყოს კომპაქტური. არაა საჭირო სხვა ტერიტორიების ათვისება, თბილისში არის ძველი საწარმოების ტერიტორიები, რაც საკმარისი რესურსია ქალაქის ასათვისებლად. მნიშვნელოვანია აგრეთვე ქალაქის პოლარიზება, რადგან ქალაქი არ უნდა იყოს კონცენტრირებული მხოლოდ ცენტრში. თბილისის სხვადასხვა რაიონში შეიქმნება გარკვეული ცენტრები თავისი რეკრიაციული ზოლებით, რათა ცენტრალური ნაწილი განიტვირთოს.

ასევე მნიშვნელოვანია რკინიგზის მონაკვეთის შემოვლით გზაზე გადატანა, ამით დაახლოებით 78 ჰექტარი ფართობი გათავისუფლდება, რაც ასევე გამოიყენება რეკრეაციული ზოლისთვის. ეს ტერიტორია არ გაიყიდება პატარ-პატარა ნაწილებად და გამოცხადდება საერთაშორისო კონკურსი. ქალაქში დღემდე პრობლემად რჩება საცობების საკითხი, ამას ახალი გზების აშენება არ უშველის, საჭიროა საზოგადოებრივი ტრანსპორტის განვითარებას უფრო მეტი ყურადღება დაეთმოს და მოწესრიგდეს“, - განაცხადა სალუქვაძემ და აღნიშნა, რომ დედაქალაქის გენერალურ გეგმაზე მუშაობა 2017 წლის აპრილისთვის დასრულდება.

მარი ნამგალაძე