საზოგადოება
თბილისში CEU-ის მხარდამჭერები უნგრეთის პრემიერ-მინისტრს საპროტესტო აქციით ხვდებიან
თბილისში, სასტუმრო „ქორთიარდ მარიოტთან“ უნგრეთის პრემიერ-მინისტრის ვიქტორ ორბანის წინააღმდეგ აქცია მიმდინარეობს. შეკრების მონაწილეები აპროტესტებენ უნგრეთის პარლამენტის მიერ დამტკიცებულ კანონს იმ უნივერსიტეტების ფუნქციონირების შესახებ, რომლებიც არ არის ევროკავშირის ქვეყნებში დაფუძნებული. ისინი ფიქრობენ, რომ ამის გამო შესაძლოა, ევროპის ცენტრალური უნივერსიტეტი დაიხუროს.
მოძრაობა „აუდიტორია 115“-ის წევრის ირაკლი კუპრაძის განცხადებით, ორბანი აკადემიურ თავისუფლებას ზღუდავს.
„უნგრეთის პრემიერ-მინისტრი ქმნის ავტორიტარულ რეჟიმს უნგრეთში, ის ხურავს ევროპის ცენტრალურ უნივერსიტეტს, სადაც განათლება მიიღეს ჩვენმა მეგობრებმა, დღესაც ჩვენი უახლოესი თანამებრძოლები, სტუდენტები არიან იქ, იღებენ განათლებას. ჩვენ სოლიდაროპბას ვუცხადებთ ამ უნივერსიტეტს“, - განაცხადა კუპრაძემ.
CEU-ის უნივერსიტეტის მხარდამჭერთა აქციის პარალელურად შეიკრიბნენ ე.წ. „ანტისოროსელები“, რომლებიც ცენტრალური უნივერსიტეტის შესაძლო დახურვას მიესალმებიან. შეგახსენებთ, რომ აღნიშნული სასწავლებელი ბუდაპეშტში მდებარე ამერიკულ-უნგრული უნივერსიტეტია, რომელიც 26 წელია არსებობს. იგი ჯორჯ სოროსის მიერაა დაფუძნებული.
ანა მებურიშვილი