ეკონომიკა

თბილისში ქართულ-რუსული ბიზნეს ფორუმი მიმდინარეობს

თბილისში ქართულ-რუსული ბიზნეს-ფორუმი მიმდინარეობს. დამსაქმებელთა ასოციაციისა და ,,უნივერს ბიზნეს ჯგუფის’’ ორგანიზებულ ღონისძიებაში მონაწილეობისთვის საქართველოს ნოვოსიბირსკელი ბიზნესმენები ეწვივნენ.

ფორუმში რუსეთის მხრიდან წარმოდგენილი არიან კომპანიები შემდეგი სექტორებიდან: ინფრასტრუქრურა, ენერგეტიკა და მშენებლობა.

როგორც ფორუმის ერთ-ერთი ორგანიზატორი, რომან ბადალიანი აცხადებს, ღონისძიების ორგანიზატორი რუსული მხარე იყო.

,,ინიციატორი იყო რუსული მხარე. ეს არის კერძოდ, ნოვოსიბირსკის ოლქიდან ბიზნესმენთა ჯგუფი. დამიკავშირდნენ იქიდან და მთხოვეს, რომ მომეხდინა ორგანიზება ქართულ კომპანიებთან ამ შეხვედრის. აღმოჩნდა, რომ ძირითადად დაინტერესებული იყვნენ ენერგეტიკის სფეროთი. დღეს აქ არის წარმოდგენილი 6 კომპანია, რომლებიც მოღვაწეობენ ენერგეტიკის სფეროში და კიდევ არის ორი კომპანია - ერთი სამშენებლო და მეორე ტურისტული’’, - განაცხადა რომან ბადალიანმა.

თავის მხრივ, როგორც ფორუმის მონაწილემ, მწარმოებელთა ფედერაციის ხელმძღვანელმა, ლევან სილაგავამ აღნიშნა, წარმოდგენილი რუსული კომპანიები რუსეთში ქართული პროდუქციის რეკლამირებით არიან დაინტერესებულნი.

,,ეს არის ენერგეტიკის სფერო, ეს არის წყლის და წყალმომარაგების სფეროები, წყლის განმწმენდი ნაგებობების სფერო. აგრეთვე არის მედიაჰოლდინგის სფერო, რომელიც დაინტერესებულია საქართველოს პროდუქციის რეკლამირებით, მათ შორის ტურისტული პროდუქციის რეკლამირებით რუსეთში და აგრეთვე არის სამშენებლო კომპანია წარმოდგენილი რუსეთის მხრიდან, რომელსაც შეუძლია ერთი და ორსართულიანი სახლების მონტაჟი და ჩაბარება’’, - განაცხადა ლევან სილაგავამ.

ფორუმის ფარგლებში ჟურნალისტებთან კომენტარი გააკეთა რუსმა ბიზნესმენმა, ალექსანდრ ლუკინმაც. მისი შეფასებით, საქართველოში ბიზნესის წარმოება მარტივია.

,,მე ენერგეტიკის სფეროს წარმოვადგენ. ჩვენ უკვე ვმუშაობთ საქართველოში, კერძოდ, ელექტროგადამცემი ხაზების საყრდენებს ვამზადებთ კინტრიში-ჰესისთვის. ვფიქრობთ, რომ საქართველოში ბიზნესის წარმოება მარტივია და ვგეგმავთ ახალ პროექტებში მონაწილეობას’’, - განაცხადა ალექსანდრ ლუკინმა.

ნინო ექვთიმიშვილი