მოზაიკა

თბილისში თომას ანდერსის კონცერტი გაიმართა

მსოფლიო სცენის ლეგენდამ, ჯგუფ " Modern Talking"- ის დამფუძნებელმა და სოლისტმა, თომას ანდერსმა თბილისის საკონცერტო დარბაზში შოუ-კონცერტი გამართა. ღონისძიება 8 მარტს, ქალთა საერთაშორისო დღეს, მიეძღვნა.

როგორც თომას ანდერსმა მის დაწყებამდე აღნიშნა, ქართველი მაყურებლისათვის წარსადგენი პროგრმა ერთ-ერთი საუკეთესოა იმ პროგრამებს შორის, რომლებიც მას ბოლო წლებში მოუმზადებია.

კონცერტზე შესრულდა ჯგუფის ყველაზე პოპულარული სიმღერები, მათ შორის, "You' re my Hard, You' re my Soul", "Cheri Cheri Lady", "Brother Louie". მეტი ეფექტისათვის გამოყენებული იყო საინტერესო ვიდეოსცენაც.

თომას ანდერსმა ქართველ მაყურებელსაც მიმართა, ქალბატონებს 8 მარტი მიულოცა და სცენიდან რამდენიმე სამახსოვრო სელფი გადაიღო.

ღონისძიებაზე უკრაინიდან დევნილებიც იმყოფებოდნენ, რომელთათვისაც კონცერტზე დასწრება უფასო იყო.

როგორც "მედიანიუსს" კონცერტის ორგანიზატორმა, კომპანია "80-იანების დისკოთეკის" პროდიუსერმა, იაროსლავ ციბამ განუცხადა, თომას ანდერსი საქართველოს საერთაშორისო ტურნეს ფარგლებში ეწვია. მანამდე ის უკვე წარდგა ბელგიელი, ლატვიელი, ბულგარელი მაყურებლის წინაშე. თბილისიდან კი მუსიკოსი დუბაიში გაემგზავრება.

შეგახსენებთ, რომ ჯგუფი "Modern Talking" 1984 წელს შეიქმნა. ის თავიდან ორ სოლისტს: თომას ანდერსსა და დიტერ ბოლენს აერთიანებდა. 2003 წელს კი ჯგუფი საბოლოოდ დაიშალა.