საზოგადოება
თეა წულუკიანმა პატიმრებს ძალიან სახიფათო გზავნილები გაუგზავნა - ნინო ლომჯარია
"თეა წულუკიანმა პატიმრებს ძალიან სახიფათო გზავნილები გაუგზავნა, რომ მათი ურთიერთობა და შეხვედრები სახალხო დამცველთან არ არის დაცული კონფიდენციალურობის გარანტით და ნებისმიერ დროს შეიძლება გასაჯაროვდეს",-ამის შესახებ ომბუდსმენმა ნინო ლომჯარიამ საგანგებო ბრიფინგზე განაცხადა.
როგორც ლომჯარიამ აღნიშნა, თუ პატიმრებს 25 წლის განმავლობაში მოპოვებული ნდობა შეერყევათ ომბუდსმენის ინსტიტუტის მიმართ, ეს ფაქტი პატიმრების მხრიდან გამოიწვევს სახალხო დამცველთან ურთიერთობის კიდევ უფრო მეტად შეზღუდვას.
"როდესაც პატიმრების სიცოცხლე, ჯანმრთელობა და უსაფრთხოება, მათი უფლებრივი მდგომარეობა შესაძლებელია ძალიან დიდი რისკის ქვეშ დადგეს. ჩვენი აპარატის ურთიერთობა პატიმრებთან ორ ფუნდამენტურ პრინციპს ეფუძნება, ნდობას და კონფიდენციალურობას. ბოლო დღეების ფაქტებით ქალბატონმა თეა წულუკიანმა პატიმრებს ძალიან სახიფათო გზავნილები გაუგზავნა, რომ მათი ურთიერთობა, კომუნიკაცია და შეხვედრები სახალხო დამცველთან არ არის დაცული კონფიდენციალურობის გარანტით და ნებისმიერ დროს შეიძლება გასაჯაროვდეს. თუ კი პატიმრებს შეერყევათ 25 წლის განმავლობაში მოპოვებული ნდობა ჩვენი ინსტიტუტის მიმართ, ჩვენი კომუნიკაციის, კონფიდენციალურობის თაობაზე, ეს ფაქტი გამოიწვევს პატიმრების მხრიდან ჩვენთან ურთიერთობის კიდევ უფრო მეტად შეზღუდვას, რაც წარმოადგენს სახალხო დამცველის საქმიანობაზე ზეგავლენის და ხელშეშლის ფაქტს", - განაცხადა ლომჯარიამ.
სახალხო დამცველმა საქართველოს პარლამენტის თავმჯდომარესა და პრემიერ-მინისტრს მიმართა.
"მოვუწოდებ საქართველოს პარლამენტის თავმჯდომარეს, პრემიერ-მინისტრს, გააკეთონ სახალხო დამცველის მხარდამჭერი განცხადებები. მოვუწოდებ საქართველოს მთავრობას, მომცენ ჩემი თანამშრომლების საქმიანობის, უსაფრთხოების გარანტიები პენიტენციურ სისტემაში, მომცენ გარანტიები, რომ ჩვენი ურთიერთობები პატიმრებთან აღარ დაექვემდებარება თვალთვალს და დაცული იქნება კონფიდენციალურობა.მოვუწოდებ საქართველოს პროკურატურას დაიწყონ დაუყოვნებლივ გამოძიება სახალხო დამცველის მიმართ უფლებამოსილების განხორციელების ხელისშეშლის და ზემოქმედების ფაქტზე.მოვუწოდებ საქართველოს იუტიციის მინისტრს თეა წულუკიანს შეწყვიტოს სახალხო დამცველის მიმართ უკანონო ქმედებები. იფიქროს ქვეყანაზე და არა საკუთარ თავზე. იფიქროს პატიმრებზე და მათ ოჯახის წევრებზე. იფიქროს რა შედეგი მოჰყვება მის ამგვარ უკანონო ქმედებებს ადამიანის უფლებების მდგომარეობაზე ქვეყანაში",- განაცხადა ნინო ლომჯარიამ.