საზოგადოება
თეატრებს უნდა გააჩნდეთ საბაზისო დაფინანსება, დამატებითი ანაზღაურება განისაზღვრება წარმატებულობის მიხედვით - მიხეილ გიორგაძე
კულტურისა და ძეგლთა დაცვის მინისტრის მიხეილ გიორგაძის განცხადებით, საქართველოში არსებული თეატრების დაფინანსების ახალი სქემა შემუშავდება.
როგორც მინისტრმა „ქრონიკის“ ეთერში ჩართვის დროს განაცხადა ,იგი უკვე ესაუბრა რამდენიმე თეატრის ხელმძღვანელს.
როგორც მინისტრმა აღნიშნა, შეხვედრაზე ხაზი გაესვა, რომ საკითხზე ფართო მსჯელობა გაიხსნება.
„მე ვპირდები ჩვენს საზოგადოებას, რომ ამას მაქსიამლური საჯაროობის და ჩართულობის ხარისხით გავაკეთებთ და მხოლოდ საერთო კონსენსუსის შედეგად მივიღებთ იმ სქემას, რომელიც მომავალში იმუშავებს“,-განაცხადა მინისტრმა
ამასთან, მიხეილ გიორგაძემ საკუთარ ხედვაზეც ისაუბრა და აღნიშნა, რომ თეატრებს უნდა გააჩნდეთ საბაზისო დაფინანსება, თუმცა დამატებითი ანაზღაურების საკითხი განისაზღვრება თეატრების წარმატებულობის მიხედვით.
„მე ვფიქრობ, რომ თეატრებს არ უნდა ქონდეთ ყოველდღიური საზრუნავი ინფრასტრუქუტრაზე, ვგულისხმობ შენონებს, ეს მათ მოწესრიგებული უნდა ქონდეთ. ასევე, კომუნალური გადასახადები და გარკვეული საბაზისო შრომის ანაზღაურება უნდა ქონდეს თეატრებში მომუშავე პერსონალს, მსახიობები იქნებიან თუ თავად ადმინისტრაცია, თუ ტექნიკური პერსონალი. დამატებითი ანაზღაურება უნდა იყოს უკვე დამოკიდებული იმაზე, თუ რამდენად წარმატებული არის თეატრი. წარმატებული როგორც საკუთარი პროდუქციის გაყიდვის თვალსაზრისით, ვგულისხმობ ბილეთებიდან შემოსულ თანხას და ასევე ძალიან აქტიურები უნდა იყვნენ სხვადასხვა გრანტების მიღების მიმართულებით, ადგილობრივი, თუ საერთაშორისო პროგრამებიდან, კერძო სექტორიდან და სხვა“,-აღნიშნა მინისტრმა.
მონიკა დავლიანიძე