მსოფლიო
ტეხასში საკვირაო წირვის დროს ატეხილ სროლას 26 ადამიანი ემსხვერპლა, ხოლო 20-მდე დაშავდა
სულ მცირე 26 ადამიანი ემსხვერპლა, ხოლო 20-მდე დაშავდა ტეხასში, საზერლენდ სპრინგსის პატარ ქალაქ ვილსონ ქაუნტრის ბაპტისტურ ეკლესიაში საკვირაო წირვის დროს მომხდარი სროლის შედეგად. ამის შესახებ ბიბისი წერს.
გავრცელებული ინფორმაციით, 23 ადამიანი ეკლესიაში მოკლეს, 2 შენობის გარეთ ჩაცხრილეს, ხოლო ერთი პირი საავადმყოფოში გარდაიცვალა.
მსხვერპლებს შორის ბავშვებიც არიან. დაღუპულთა ასაკი 5-დან 72 წლამდე მერყეობს.
სავარაუდო თავდასხმელი შემდგომ მკვდარი იპოვეს მის მანქანაში ეკლესიისგან რამდენიმე მილის მოშორებით. ადგილობრივი მედიის ინფორმაციით, ის 26 წლის დევინ პატრიკ კელი აღმოჩნდა.
როგორც გაირკვა, 2014 წელს კელი გაათავისუფლეს აშშ-ის საჰაერო ძალებიდან, რასაც წინ უძღოდა სასამართლო პროცესი ცოლსა და ბავშვზე ძალადობის გამო.
თვითონ ბაპტისტურ ეკლესიაში მომხდარი მასობრივი მკვლელობის მოტივი უცნობია.
ტეხასის გუბერნატორ გრეგ ებოტის განცხადებით, ეს ყველაზე საზარელი თავდასხმაა შტატის ისტორიაში.
ამბავს გამოეხმაურა აშშ-ის პრეზიდენტი დონალდ ტრამპი, რომელიც აზიურ ტურნეში იმყოფება.
„ღმერთმა დაეხმაროს ტეხასის საზერლენდ-სპრინგსის ხალხს. გამოძიების ფედერალური ბიურო და სამართალდამცავი ორგანოები მომხდარის ადგილზე მუშაობენ. სიტუაციას ვაკვირდები იაპონიიდან“, - დაწერა ტრამპმა ტვიტერის საკუთარ გვერდზე.
ანა მებურიშვილი