საზოგადოება

თელავის საბავშვო ბაღთან დაკავშირებული ინფორმაცია, საბედნიეროდ, არ დადასტურდა - დავით სერგეენკო

საქართველოს ჯანდაცვის მინისტრის, დავით სერგეენკოს ინფორმაციით, მედიით გასული ინფორმაცია, რომ თელავის საბავშვო ბაღების სისტემაში ბავშვების რაციონი შეამცირეს, სიმართლეს არ შეესაბამება.

ამის შესახებ სერგეენკომ მთავრობის სხდომის დასრულების შემდეგ განაცხადა.

„უკვე დაზუსტებული ინფორმაცია მაქვს, კონკრეტულად რა შემთხვევასთან გვქონდა საქმე თელავის რაიონის შემთხვევაში. საბედნიეროდ, ეს ყველაფერი არ დადასტურდა. კონკრეტულად იქ მოხდა ასეთი რამ - რამდენიმე საბავშვო დაწესებულებაში მოხდა მენიუს ცვლილება. კერძოდ, იმ კვირაში გუფთა შეცვალეს კოტლეტით, რადგან ბავშვებს ასე ესიამოვნათ. რაც შეეხება რძის პროდუქტების ამოღებას, ეს არ მომხდარა. როდესაც ბავშვებს ეხება საკითხი, ნებისმიერი თემა მგრძნობიარეა. ასე რომ, ერთი მხრივ მოვუწოდებ ჟურნალისტებს, მედიასაშაულებებს, ნუ შეეხებით ბავშვთა ჯანმრთელობისა და კვების თემას,ვიდრე არ დარწმუნდებით, რომ ეს ობიექტური რეალობაა. მეორე მხრივ, ბავშვთა აღზრდის დაწესებულებებს მოვუწოდებ, ძალიან მკაცრად დაიცვან ის რეგლამენტები და რეკომენდაციები, რომლებიც მთავრობის დადგენილებითაა გაწერილი. რაც შეეხება კონკრეტულ საინფორმაციო საშუალებებს, სადაც ეს ინფორმაცია გავრცელდა, ჩემი მოქალაქეობრივი სათხოვარი იქნება, რომ ჯერ ჩაეხედათ ამ თემაში და შემდეგ დაეწერათ. ახლა კარგს იზამენ, თუ ამ ყველაფრის სწორ, ობიექტურ აღწერას გააკეთებენ და ვფიქრობ, ამ ბავშვების მშობლებს მოუხდიან ბოდიშს ამ მღელვარების გამო“,-განაცხადა დავით სერგეენკომ.

მთავრობის სხდომაზე, დღეს, პრემიერ-მინისტრმა მედიაში გავცრელებულ ინფორმაციას გამოეხმაურა და აღნიშნა, რომ „თუ ვინმემ ადმინისტრაციული ხარჯების ოპტიმიზაცია გაიგო ისე, რომ საბავშვო ბაღებში ბავშვებს რაციონი უნდა შევუმციროთ, ეს არის დანაშაულებრივი გადაწყვეტილება. თუ ასეთი ჩინოვნიკი ბუნებაში არსებობს, მინდა, რომ ის აღარ იყოს ხვალ თავის თანამდებობაზე“.

პრემიერ-მინისტრმა განათლებისა და ჯანდაცვის მინისტრს თემის დაზუსტება დაავალა.

მონიკა დავლიანიძე