საზოგადოება

თემირლან მაჩალიკაშვილის ჯანმრთელობის მდგომარეობა გაუარესდა

პანკისში სპეცოპერაციის დროს დაჭრილი 19 წლის თემირლან მაჩალიკაშვილის ჯანმრთელობის მდგომარეობა კვლავ მძიმეა.

მედიკოსების შეფასებით, პაციენტი მართვით სუნთქვაზე რჩება, კვლევების შედეგად კი, გამოჩნდა, რომ ზოგიერთი პარამეტრი კი გაუარესებულია.

ექიმები ამბობენ, რომ მაჩალიკაშვილის წნევას სპეციალური მედიკამენტებით უნარჩუნებენ.

ექიმებთან საუბრის შემდეგ 19 წლის ახალგაზრდის მამამ უცხოეთიდან სპეციალისტების მოწვევის გადაწყვეტილება მიიღო. მალხაზ მაჩალიკაშვილი არ გამორიცხავს, რომ შვილი სამკურნალოდ საზღვარგარეთ წაიყვანოს.

ცნობისათვის, სუს-მა თბილისსა და პანკისის ხეობაში სპეცოპერაციის დროს 5 პირი დააკავა, რომელთაგან ერთ-ერთიც თემირლან მაჩალიკაშვილი იყო. ყველა მათგანს თბილისში, ბერი გაბრიელ სალოსის გამზირზე ჩატარებული სპეცოპერაციისას განეიტრალებულ პირებთან კავშირს ედავებიან.

სპეცოპერაციის დროს მაჩალიკაშვილი თავის არეში დაიჭრა. მას თელავის რეფერალურ საავადმყოფოში ოპერაცია გაუკეთდა, რის შემდეგაც თბილისში გადმოიყვანეს.