საზოგადოება

თემირლან მაჩალიკაშვილის ოჯახი დაჭრილის თურქეთის კლინიკაში გადაყვანას დათანხმდა

სოფელ დუისში 26 დეკემბრის სპეცოპერაციის შედეგად დაჭრილ თემირლან მაჩალიკაშვილს თურქეთში გადაიყვანენ. ადგილობრივი კლინიკის შეთავაზებას დაშავებულის ოჯახი დათანხმდა.

თემირლანის მამის, მალხაზ მაჩალიკაშვილის მტკიცებით, შსს-მ და სუს-მა ოჯახს ევროპულ კლინიკებში „გზა გადაუკეტა“.

,,ვითარება უცვლელია, მდგომარეობა არის კრიტიკული. ჩვენ ვითხოვდით ჩემი შვილის გერმანიაში გადაყვანას, მაგრამ სუს-მა და შსს-მ ევროპისკენ ყველა გზა გადაგვიკეტა, ამიტომ დავთანხმდით თურქეთში გადაყვანაზე. ამ ეტაპზე ჩემი შვილის მდგომარეობა მაღელვებს, რომ მოხერხდეს სასწრაფოდ მისი გადაყვანა, რადგან ერთი დღის დაკარგვაც ბევრს ნიშნავს“, -თქვა მალხაზ მაჩალიკაშვილმა.

წმინდა მიქაელ მთავარანგელოზის სახელობის კლინიკური საავადმყოფოს ექიმის, ზაზა ლურსმანაშვილის თქმით, 19 წლის თემირლანს სტამბოლის „კოჩის“ კლინიკაში გადაიყვანენ.

„ამ კლინიკის მენეჯერი ცოტა ხნის წინ იყო ჩვენთან ჩამოსული. მას პაციენტის შესახებ ინფორმაცია ჰქონდა ჯერ კიდევ 29 დეკემბერს ოჯახის მხრიდან მიწოდებული მასალების საფუძველზე. ეს არის სტამბოლში მდებარე ,,კოჩის” კლინიკა. ჩემს ხელთ არსებული ინფორმაციით, ოჯახმა თანხმობა განაცხადა ცოტა ხნის წინ. ჯანდაცვის სამინისტრომ დაიწყო შესაბამისი პროცედურები, გარკვეული ეტაპები იქნება გასავლელი, რადგან ამას რაღაც დრო დასჭირდება, შესაძლოა რამდენიმე დღე“, -აღნიშნა ექიმმა.

ჯანდაცვის სამინისტროს ინფორმაციით, მაჩალიკაშვილის მიღებაზე გერმანულმა კლინიკამ „შარიტემ“ უარი განაცხადა.

ანა მებურიშვილი