საზოგადოება

ტექნიკური უნივერსიტეტის ორი ფაკულტეტი ნატოს საგრანტო პროექტში ჩაერთვება

საქართველოს ტექნიკური უნივერსიტეტის სამშენებლო და ინფორმატიკისა და მართვის სისტემების ფაკულტეტები ნატოს საგრანტო პროექტში ჩაერთვებიან. კონსორციუმში შემავალ რვა ქვეყნის წამყვან უნივერსიტეტებს შორის, ტექნიკური უნივერსიტეტი ერთადერთი ქართული უმაღლესი დაწესებულებაა, რომელიც ამ დიდ პროექტში მონაწილეობას მიიღებს, - ამის შესახებ ინფორმაციას საქართველოს ტექნიკური უნივერსიტეტის საზოგადოებასთან ურთიერთობის დეპარტამენტი ავრცელებს.

პროექტში, რომელიც წყლის კიბერუსაფრთხოებას ეხება, საქართველოს ტექნიკური უნივერსიტეტის გარდა, ნორვეგიის, იტალიის, ესპანეთის, გერმნანიის, აშშ-ის და ჩინეთის წამყვანი უნივერსიტეტებია ჩართული.

„მინდა ხაზგასმით აღვნიშნო, რომ ნატოს წარმომადგენლობამ მოითხოვა პროექტში საქართველოს და კონკრეტულად ტექნიკური უნივერსიტეტის ჩართვა. ინიციატივა ჩვენი უნივერსიტეტის კონსორციუმში ჩართვას გულისხმობს. კონსორციუმის სათავო ოფისი ნორვეგიაშია, ეს არის მსოფლიოში გარემოს დაცვის ცნობილი ცენტრი, რომელიც მშენებლობისა და წყლის პრობლემებზე მუშაობს. პროექტში ქართული მხარის ჩართვა ჰიდროინჟინერიისა და წყალმომარაგების თვალსაზრისით მოხდა, ვინაიდან ამ მიმართულებით საქართველოს ტექნიკურ უნივერსიტეტს დიდი გამოცდილება აქვს. მათ სურთ ჩვენი გამოცდილება გამოიყენონ ამ მეტად მნიშვნელოვან საკითხის გადასაწყვეტად“, - აცხადებს სტუ-ის სამშენებლო ფაკულტეტის დეკანის მოვალეობის შემსრულებული, პროფესორი ზურაბ გვიშიანი.

პროფესორი ზურაბ გვიშიანი განმარტავს, რომ საქართველოს ტექნიკური უნივერსიტეტი ერთ-ერთი პირველთაგანი იყო, სადაც გამოთვლითი ტექნიკისა და ტელემეტრიის გამოყენება დაიწყეს.

„საქართველოში, ბოლო წლების განმავლობაში ჩამდინარე წყლის გამწმენდი ექვსი ნაგებობა ექსპუატაციაში შევიდა და აღჭურვილია თანამედროვე მართვის ელოქტრონული სისტემით. მანამდე ეს ცამდინარე წყლები გარემოში იღვრებოდა. ჩვენ მიერ მოხდება ამ სისტემების აპრობაცია. ეს არის უხვი ინფორმაციის მიწოდების სისტემა, რომელიც საშუალებას გვაძლევს მოთხოვნისამებრ, დისტანციურად მივიღოთ მონაცემები. ეს წყლის, გამოთვლითი ტექნიკისა და ტელემეტრიის მიმართულებით ჩვენი გამოცდილების გამოყენების საშუალებას იძლევა“, - აღნიშნავს სამშენებლო ფაკულტეტის დეკანის მოვალეობის შემსრულებელი ზურაბ გვიშიანი.