მსოფლიო

ტერორისტული ჯგუფები განაგრძობენ თავდასხმების მომზადებას - აშშ-ის სახელმწიფო დეპარტამენტი

აშშ-ის სახელმწიფო დეპარტამენტში აცხადებენ, რომ შრი-ლანკაზე ტერორისტები თავდასხმებს კვლავ ამზადებენ. ამის შესახებ განცხადება აშშ-ის საგარეო უწყების ვებგვერდზე გამოქვეყნდა.

„ტერორისტული ჯგუფები განაგრძობენ თავდასხმების მომზადებას. ტერორისტების სამიზნე შეიძლება გახდეს ტურისტული ადგილები, სატრანსპორტო კვანძები, მაღაზიები, ადგილობრივი ხელისუფლების შენობები, სასტუმროები, კლუბები, რესტორნები, სამლოცველოები და პარკები“, – ნათქვამია სახელმწიფო დეპარტამენტის განცხადებაში.

აშშ-ის სახელმწიფო დეპარტამენტი მოუწოდებს ამერიკის მოქალაქეებს და ამერიკელ დიპლომატებს, სიფრთხილე გამოიჩინონ.

შრი-ლანკაში ეკლესიებსა და სასტუმროებში 21 აპრილს მომხდარი აფეთქებების შედეგად დაღუპულთა რიცხვი 290-მდე გაიზარდა. ქვეყნის პოლიციის დეპარტამენტის ინფორმაციით, რვა აფეთქების შედეგად 500 ადამიანია დაშავებული.

შრი-ლანკის სამ ეკლესიაში და ოთხ სასტუმროში მომხდარ აფეთქებაზე პასუხისმგებლობა არც ერთ სამხედრო ორგანიზაციას ან დაჯგუფებას არ აუღია. ვრცელდება ინფორმაცია, რომ შრი-ლანკის ხელისუფლებას თავდასხმებთან დაკავშირებით უკვე აქვს წინასწარი ინფორმაცია, რომელიც ნაკლებად ცნობილ ისლამისტურ ჯგუფს უკავშირდება.