პოლიტიკა

თინა ხიდაშელი - ირაკლი სესიაშვილზე: ჩვენ უკვე 15 წელია გვიყვარს ერთმანეთი (ვიდეო)

თავდაცვის მინისტრმა, თინა ხიდაშელმა და პარლამენტის თავდაცვისა და უშიშროების კომიტეტის თავმჯდომარემ, ირაკლი სესიაშვილმა ჟურნალისტებს ერთად გასცეს პასუხი ურთიერთბრალდებებსა და ერთმანეთის მისამართით გაკეთებულ კრიტიკულ შენიშვნებთან დაკავშირებით.

მედიის წარმომადგენლებმა ისინი მეგობრულ ვითარებაში დააფიქსირეს თავდაცვის ინსტიტუციური აღმშენებლობის სკოლის გახსნაზე.

,,განსხვავებული პოზიციები არის ის ძალა, რაც ჩვენ გვაფიქრებინებს, რომ უკეთესი სისტემა გავაკეთოთ’’, - თქვა ირაკლი სესიაშვილმა.

თავის მხრივ, თინა ხიდაშელმა ჟურნალისტებს განუცხადა:

,,ჩვენ უკვე 15 წელია გვიყვარს ერთმანეთი. ასე რომ, ჩვენს სიყვარულში ვერ შეიტანთ ბზარს.’’

ჟურნალისტებთან დიალოგი კი, პოლიტიკოსებმა ერთმანეთის გადაკოცნით დაასრულეს.

შეგახსენებთ, რომ ირაკლი სესიაშვილის კრიტიკა გამოიწვია თინა ხიდაშელის გადაწყვეტილებამ სამხედრო სავალდებულო სამსახურში გაწვევის გაუქმებასთან დაკავშირებით. თავდაცვისა და უშიშროების კომიტეტის თავმჯდომარემ ხიდაშელს თავდაცვის მინისტრის თანამდებობის დატოვებაც უწინასწარმეტყველა.

ხიდაშელმა სესიაშვილს კრიტიკას უპასუხა და თქვა, რომ თავდაცვისა და უშიშროების კომიტეტის თავმჯდომარეს ფილოსოფიური პრობლემა აქვს.

,,ის გულწრფელია, როცა გაბრაზებულია. სესიაშვილს აქვს ფილოსოფიური პრობლემა, ჩვენ გვაქვს ხედვების აბსოლუტური არათანხვედრა. მას მიაჩნია, რომ მონური შრომა 21 საუკუნეში ნორმალურია, მე მიმაჩნია, რომ ეს არ არის ნორმალური. ჩვენ ძალიან სხვადასხვა მხარეს ვდგავართ,“- განაცხადა თინა ხიდაშელმა.

ნინო ექვთიმიშვილი