არქივი
საზოგადოება
თითოეული ებრაელი რიგითი ჯარისკაცია, თუ ეს ისრაელს ჭირდება _ იციკ მოშე
დღეს „ისრაელის სახლში“ ისრაელის ომებში დაღუპულ ებრაელ ჯარისკაცთა ხსოვნის დღე - იომ-ჰა-ზაქირონ აღინიშნა. ღონისძიებას სტუმრები ისრაელიდან, ისრაელის ომებში მონაწილე ყოფილი ჯარისკაცები, საქართველოში ისრაელის კომპანიებისა და მსოფლიო ებრაული სააგენტოსა წარმომადგენლები ესწრებოდნენ.
დამსწრე საზოგადოებას სიტყვით მიმართა „ისრაელის სახლის“ დამფუძნებელმა და ხელმძღვანელმა იციკ მოშემ. მისი თქმით, ისრაელმა, სახელმწიფოს შექმნის დღიდან, ქარ-ცეცხლი გამოიარა, დაიღვარა ათასობით უდანაშაულო ადამიანის სისხლი, დაიღუპა 25 ათასამდე მეომარი, და მიუხედავად ამისა, ისრაელი გახდა მსოფლიოს ერთ-ერთი წამყვანი ქვეყანა, თავისი ეკონომიკით, ჰაიტეკით, შეიარაღებული ძალებით და, რაც მთავარია, ისრაელელთა საერთო ნებით, იდგნენ სამშობლოს სადარაჯოზე. „თითოეულმა ისრაელელმა იცის, რაოდენ მნიშვნელოვანია მისი როლი ქვეყნის გადარჩენაში და ის ამას აკეთებს ნებაყოფლობით. ხალხი და მთავრობები ერთიანია ამ საქმეში და ამის შედეგია ის, რომ თითოეული ებრაელი რიგითი ჯარისკაცია, თუ ეს ქვეყანას ჭირდება. ამ დროის განმავლობაში ჩვენ დავკარგეთ ღირსეული შვილები, მაგრამ მათ სიკვდილით სიცოცხლე გვიანდერძეს“, _ განაცხადა იციკ მოშემ.
ღონისძიების მონაწილეებს დაღუპული მეგობრების გმირობების შესახებ უამბეს ყოფილმა ჯარისკაცებმა ისრაელიდან, რონი ლაიშმა და ორენ მოსკოვიჩმა. მათი თქმით, ყოველწლიურად ამ დღეს დაღუპულ მეომართა საფლავებზე ატარებენ. მათ მადლობა გადაუხადეს „ისრაელის სახლს“ ღონისძიების ორგანიზებისთვის. ორენ მოსკოვიჩმა ისრაელის ომებში დაღუპულ ებრაელ ჯარისკაცთა ხსოვნის სპეციალური ლოცვაც წაიკითხა.
ხსოვნის საღამოზე გაიმართა ისრაელის ომების შესახებ დოკუმენტური ფილმის ჩვენება. ღონისძიება ისრაელის სახელმწიფო ჰიმნით დასრულდა.
ცნობისთვის: ისრაელის ომებში დაღუპულთა ხსოვნისა და ტერორის მსხვერპლთა ხსოვნის დღე _ იომ ჰა-ზაქირონ წელს 1 მაისს აღინიშნა. ისრაელის სახელმწიფო გლოვის დღე ქვეყნის დამოუკიდებლობის გამოცხადების წინა დღით აღინიშნება.
საერთო ნაციონალური გლოვის დღეს ტარდება სახელმწიფოებრივი ღონისძიებები. აღნიშვნა წინადღით, 20.00 საათზე წუთიერი დუმილით იწყება. ოფიციალური ცერემონია იმართება გოდების კედელთან, სადაც დაშვებულია ისრაელის სახელმწიფოს დროშა. მეორე დღეს, დილის 11 საათზე ისმის ორწუთიანი სირენა, რომელსაც ისრაელელთა დიდი ნაწილი დუმილით ხვდება, ჩერდება მანქანები, მატარებლები..
ამის შემდეგ იწყება ხსოვნის ოფიციალური და კერძო ღონისძიებები სასაფლაოებზე, სადაც ჯარისკაცები არიან დაკრძალული.