საზოგადოება

ცაბაძის ქუჩაზე ხანძრის შედეგად დაშავებულ ქალს სხეულის 40 პროცენტი, ხოლო მამაკაცს 20 პროცენტი აქვს დამწვარი

თბილისში, ცაბაძის ქუჩაზე ხანძრის შედეგად დაშავებულების მდგომარეობა ამ დრომდე მძიმე რჩება.

დაშავებული 59 წლის ქალი და 29 წლის მამაკაცი დამწვრობის ცენტრის რეანიმაციულ განყოფილებაში იმყოფებიან.

დამწვრობის ცენტრის ხელმძღვანელმა გუგა ქაშიბაძის ინფორმაციით, ქალს სხეულის 40 პროცენტი, ხოლო მამაკაცს 20 პროცენტი აქვს დამწვარი.

,,ქალს დამწვრობა სახეზე, ასევე ზემო და ქვედა კიდურებზე აქვს, ხოლო მამაკაცს დამწვრობა ზურგისა და თავის მიდამოებში აღენიშნება“,- განაცხადა ქაშიბაძემ საზოგადოებრივ მაუწყებელთან საუბარში.

მისივე თქმით, ორივე პაციენტის მდგომარეობა სტაბილურად მძიმეა და მიღებული დამწვრობა სიცოცხლისთვის სახიფათოა.

ცნობისათვის, გიორგი ცაბაძის ქუჩაზე ცეცხლი საცხოვრებელ ბინაში წუხელ გაჩნდა. შემთხვევის შედეგად ორი ადამიანი დაიღუპა.

ხანძრის გამომწვევი მიზეზი ამ დროისთვის უცნობია. მომხდარ ფაქტზე გამოძიება საქართველოს სისხლის სამართლის კოდექსის 188-ე მუხლით დაიწყო.