ეკონომიკა
წარმოდგენილ საპენსიო რეფორმას სერიოზული ანალიზი არ ახლავს - ლევან გოგიჩაიშვილი
დაგროვებითი პენსიის რეფორმასთან დაკავშირებით მომზადებულ საკანონდებლო ცვლილებებზე იურიდიულ საკითხთა საპარლამენტო კომიტეტზე მსჯელობენ.
უმრავლესობის წევრმა, ლევან გოგიჩაიშვილმა წარდგენილ რეფორმაზე მეტი ინფრომაცია მოითხოვა. დეპუტატის მტკიცებით, საკანონმდებლო ცვლილებებს ანალიზი აკლია.
„წარმოდგენილ საპენსიო რეფორმას სერიოზული ანალიზი არ ახლავს. როდესაც მთხოვენ, გადაწყვეტილება მივიღო, მეტი ინფორმაცია მჭირდება პროექტის შესახებ. სამი ფურცელი განმარტებითი ბარათი არ არის სრულყოფილი ინფორმაციის მომცემი. ეს საკითხი თითოეული ჩვენგანის მომავალს ეხება და უფრო დეტალური ინფორმაციაა საჭირო“, – განაცხადა გოგიჩაიშვილმა.
დეპუტატმა აღნიშნა, რომ კანონპროექტი რისკებს შეიცავს.
„არის რისკები უმუშევართა რიცხვის გაზრდასთან დაკავშირებით. შესაძლოა, ბიზნესმა ასაკობრივი ცენზი შემოიღოს. დარწმუნებული არ ვარ 100%-ით, რომ მხარი დავუჭირო წარმოდგენილ საპენსიო რეფორმას. თუმცა, გამომდინარე იქიდან, რომ ქვეყნისთვის საჭიროა ამ რეფორმის გატარება, მე მხარს დავუჭერ“, -თქვა გოგიჩაიშვილმა.
კერძო დაგროვებითი საპენსიო სისტემა უკვე 2018 წლის მესამე კვარტლიდან ამოქმედდება, აღნიშნული კანონპროექტი გულისხმობს შენატანის საპენსიო სქემის შექმნას.
კანონპროექტით დგინდება საპენსიო შენატანების განხორციელების წესი და ოდენობა. პროექტი განსაზღვრავს საჯარო სამართლის იურიდიული პირის - საპენსიო სააგენტოს შექმნასა და მის საქმიანობასთან დაკავშირებულ წესებს, აგრეთვე ეროვნული ბანკის უფლებამოსილებებს. კანონპროექტი აგრეთვე აწესრიგებს დაგროვებითი პენსიის ადმინისტრირებასთან, საპენსიო სქემაში გაწევრიანებასთან, დავების გადაწყვეტილებასთან და აღსრულებასთან დაკავშირებულ საკითხებს.