არქივი
სამართალი
წარმოუდგენელია, როდესაც სასულიერო პირები საუბრობდნენ იმ ფორმით და იმ საკითხებზე, რომელზეც ჩანაწერში იყო საუბარი - ირმა ჭკადუა
ე.წ. ციანიდის საქმის ერთ-ერთი მოწმის, ადვოკატ ირმა ჭკადუს განცხადებით, საქმეში მტკიცებულების სახით არსებულ აუდიო ჩანაწერში სამი პირი მონაწილეობს.
ჭკადუა მამა გიორგი მამალაძის ბრალდების საქმეში მთავარი მოწმესთან, ირაკლი მამალაძესთან კონტაქტის დეტალებს იხსენებს, რომელმაც მისი თქმით, საქმეში არსებული ჩანაწერები მოასმენინა.
მისი შეფასებით, აღნიშნული ჩანაწერები არის ძალიან მძიმე მოსასმენი.
„მომასმენინა თავდაპირველად აუდიოჩანაწერი, რომელიც ძალიან მძიმეა მოსასმენად. სამი პირი ფიგურირებდა. წარმოუდგენელია, როდესაც სასულიერო პირები ან ეკლესიასთან დაკავშირებული პირები საუბრობდნენ იმ ლექსიკონით, იმ ფორმით და იმ საკითხებზე, რომელ საკითხებზეც იყო ჩანაწერში საუბარი.
მე მას ვთხოვე, რომ ერთ-ერთი მტკიცებულება მაინც მოეცა ჩემთვის, მაგრამ ის კატეგორიულად წინააღმდეგი იყო, ვინაიდან ის ამბობდა - ეს არის ჩემი თავდაცვა. ის იყო ძალიან შეშინებული ამ ყველაფერზე და 30-ში თუ პირველში არ მახსოვს, მან ისევ დამირეკა და მკითხა სად ხარო, ვუთხარი სადაც ვიყავი და მითხრა, რომ სადაც ხარ გაჩერდი უნდა მოვიდე სასწრაფოდ და მან მოიტანა კიდევ ერთ ისეთი მტკიცებულება, რომელიც იყო განგაშის ატეხვის საფუძველი, ამ ჩანაწერში სახიფათო რამ იყო აღბეჭდილი. მან თქვა, რომ ამ ჩანაწერის შემდეგ გადაწყვიტა, აუცილებლად წასულიყო სამართალდამცავ ორგანოებთან.
იქ არის შოკისმომგვრელი მასალა და დარწმუნებული ვარ, რომ საქართველოს არცერთ მოქალაქეს არცერთი კითხვა არ დარჩება ამ მასალის მოსმენის შემდეგ.
უბრალოდ პროკურატურა და სახელმწიფო დღეს უფრთხილდება საპატრიარქოს პრესტიჟს “ - აცხადებს ირმა ჭკადუა.
ნინო ექვთიმიშვილი