პოლიტიკა

წარსულში ხშირად ყოფილა, რომ ეს კვლევები არ ასახავს შემდგომში მიღებულ რეალობას - გიორგი კვირიკაშვილი

საქართველოს პრემიერ-მინისტრი, გიორგი კვირიკაშვილი ,,ეროვნულ დემოკრატიული ინსტიტუტის’’ მიერ გამოქვეყნებული საზოგადოებრივი კვლევის შედეგებს ეხმაურება.

ჟურნალისტებთან საუბრისას მთავრობის მეთაურმა აღნიშნა, რომ NDI-ს კვლევა ეს არის ტექნიკური საკითხი.

კვირიკაშვილის თქმით, ის ჯერ კვლევას არ გაცნობია, თუმცა მას მაინც სკეპტიკურად აფასებს.

,,კვლევებთან დაკავშირებით მე მაქვს ჩემი საკმაოდ საფუძვლიანი, სკეპტიკური დამოკიდებულება, ვინაიდან, წარსულში ხშირად ყოფილა, რომ ეს კვლევები არ ასახავს შემდგომში მიღებულ რეალობას. ამიტომ, ჩვენთვის მთავარია, რომ მოთმინებით დაველოდოთ არჩევნებს, მშვიდობიანად ჩავატაროთ წინასაარჩევნო პერიოდი და შემდგომში საქართველოს მოსახლეობა გადაწყვეტს რა არის მათთვის პრიორიტეტი, რომელი ჯგუფია მათთვის უფრო მისაღები, რომელი გუნდია უფრო მისაღები და მე დარწმუნებული ვარ, რომ ჩვენი გუნდი უალტერნატივოდ გაიმარჯვებს, დიდი უპირატესობით,“- განაცხადა გიორგი კვირიკაშვილმა.

ცნობისათვის: NDI-მ კვლევა ჩაატარა, რომლისთვისაც დაახლოებით 4 ათასზე მეტი ადამიანი გამოკითხა. დღეს კვლევის ის ნაწილი გასაჯაროვდა, რომელიც ქვეყნის საგარეო კურსს, ეკონომიკასა და მასმედიას ეხება.

ეროვნულ-დემოკრატიული ინსტიტუტის კვლევის შედეგების თანახმად, გამოკითხულთა უმრავლესობა მიიჩნევს, რომ 2012 წლის ოქტომბრის შემდეგ ის და მისი ოჯახი იმავე მდგომარეობაშია.

ამასთან, კითხვაზე ახორციელებს თუ არა ხელისუფლება მნიშვნელოვან ცვლილებებს- ამ კითხვაზე NDI-ს მიერ გამოკითხული რესპონდენტების დაახლოებით 40% მიიჩნევს, რომ მთავრობა აღნიშნულ ცვლილებებს ახორციელებს.