ეკონომიკა

წელს მევენახეებს ჩაუბარებელი ყურძენი არ დარჩებათ - ლევან დავითაშვილი

სოფლის მეურნეობის მინისტრის, ლევან დავითაშვილის განცხადებით, წელს მევენახეებს ჩაუბარებელი ყურძენი არ დარჩებათ.

მინისტრის თქმით, კერძო სექტორი მოტივირებულია, რომ ყურძენი შეიძინოს, რამაც გაზრდილმა ექსპორტმა განაპირობა.

„ვფიქრობთ, წელს 100-ზე მეტი ღვინის კომპანია ინდუსტრიულად 150 ათას ტონაზე მეტ ყურძენს გადაამუშავებს. წლევანდელი რთველი წარმატებული იქნება.

ძალიან რთულ კლიმატურ პირობებში, როცა ბევრ სხვა სასოფლო-სამეურნეო კულტურას პრობლემა შეექმნა, ყურძნის საკმაოდ უხვი, ფაქტობრივად, სარეკორდო მოსავალი გვაქვს. ღვინის კერძო კომპანიების მხრიდან ყურძენზე მოთხოვნა საკმაოდ მაღალია. ეს რამდენიმე ფაქტორმა განაპირობა, პირველ რიგში, გაზრდილმა ექსპორტმა. წელს ექსპორტის მიმართულებითაც რეკორდულ მაჩვენებლს ველოდებით.

კერძო სექტორი მაქსიმალურად მოტივირებულია, რომ ყურძენი შეიძინოს. მევენახეებს ჩაუბარებელი ყურძენი არ დარჩებათ“,-განაცხადა სოფლის მეურნეობის მინისტრმა.

დღეს, ლევან დავითაშვილი თელავში, სასტუმრო „ალაზნის ველში“, 2017 წლის რთველის საკოორდინაციო შტაბს გახსნის.

მონიკა დავლიანიძე