პოლიტიკა
ცესკომ თბილისის საკრებულოს ნაციონალური მოძრაობის სიიდან 6 პირი ამოიღო
ცენტრალურმა საარჩევნო კომისიამ დააკმაყოფილა ნაციონალური მოძრაობის მოთხოვნა, 2014 წლის თვითმმართველობის არჩევნებისთვის წარდგენილი პარტიული სიიდან ექვსი პირის ამოიღების თაობაზე და თბილისის საკრებულოს პარტიული სიიდან ქეთი ქოჩორაშვილი, გიორგი ჩაჩანიძე, ალექსი თაბუაშვილი, ნიკოლოზ ბაჩილავა, თორნიკე ხუციშვილი და ნინო ბაბუნიძე ამოიღო.
,,ბლოკმა ერთიანი ნაციონალური მოძრაობა, მომართა ცენტრალურ საარჩევნო კომისიას და მოითხოვა 2014 წლის ადგილობრივი თვითმმართველობის არჩევნების თბილისის საკრებულოს პარტიული სიიდან ექვსი პირის ამოღება, რაც, რა თქმა უნდა, დააკმაყოფილა ცენტრალურმა საარჩევნო კომისიამ კანონმდებლობის თანახმად“, - განაცხადა ცესკოს სპიკერმა ანა მიქელაძემ ცესკოს სხდომის დასრულების შემდეგ.
როგორც მედიანიუსს ნაციონალური მოძრაობის წევრმა თინა ბოკუჩავამ განუცხადა, აღნიშნული პირების სიიდან ამოღების შემდეგ, საკრებულოში დავით ავალიანი შევა, რომელიც ირაკლი აბესაძის ადგილს დაიკავებს.
,,საუბარია საკრებულოში ირაკლი აბესაძის ჩანაცვლებაზე, რომელიც 8 ოქტომბრის არჩევნების შემდეგ გახდა საქართველოს პარლამენტის დეპუტატი. შესაბამისად, მისი გამოსვლის შედეგად სიამ უნდა აიწიოს. როგორც ვიცი, პარტიამ და განსაკუთრებით თბილისის ორგანიზაციამ გადაწყვიტა, რომ ის ადამიანი, რომელიც ამ სხვა პირების სიიდან ამოსვლის შემთხვევაში შევა საკრებულოში, ყველაზე უკეთ დაიცავს იმ მოქალაქეების ინტერესებს, რომლემაც მხარი დაუჭირეს 2014 წლის ადგილობრივი თვითმმართველობის არჩევნებში ნაციონალურ მოძრაობას და უკეთესად მოემსახურება ჩვენი ამოცანების შესრულებას.
რამდენადაც ვიცი, ეს არის დავით ავალიანი, რომელც თბილისის ორგანიზაციის გადაწყვეტილებით, შევა ამ პირების სიიდან ამოსვლის შედეგად“, - განაცხადა თინა ბოკუჩავამ.
მარი ნამგალაძე