საზოგადოება

ცეცხლის გავრცელების არეალი ბორჯომში შემცირებულია - პრემიერ-მინისტრი

საქართველოს პრემიერ-მინისტრის, გიორგი კვირიკაშვილის ინფორმაციით, ბორჯომის ხეობაში ხანძარი შემცირებულია და ცეცხლი ძირითადად წაღვერისა და ტიმოთესუბნის ქედზეა გავრცელებული.

„ატენის ხეობაში ხანძარი ლიკვიდირებულია, მთელი ღამის განმავლობაში იმუშავეს ჯარისკაცებმა, შემდეგ მეხანძრე მაშველების დახმარებით საბოლოოდ ჩააქრეს ხანძარიც. ცეცხლის გავრცელების არეალი არის შემცირებული ბორჯომში, თუმცა რჩება რამდენიმე კერა, წაღვერისა და ტიმოთესუბნის ქედზე გავრცელებული ცეცხლი. ამ წუთას მთელი ავიაციაა მობილიზება ამ კერაზე ხდება. მოგვიწევს ინტენსიური სამუშაოები, რათა ეს კერა დავძლიოთ“, - განაცხადა პრემიერმა.

შეგახსენებთ, ცეცხლი ბორჯომის ხეობაში 20 აგვისტოს გაჩნდა. ადგილზე სახანძრო-სამაშველო სპეცოპერაციაში ქართულ მხარეს ეხმარებიან თურქეთი, აზერბაიჯანი, სომხეთი და ბელორუსი.

რაც შეეხება ატენის ხეობას, ხანძარი იქ გუშინ, საღამოს 5-6 საათის მონაკვეთზე გაჩნდა. ცეცხლი იქ უკვე ლიკვიდირებულია და 2 დღის განმავლობაში ჩატარდება ნახანძრალის მონიტორინგი.

ანა მებურიშვილი