საზოგადოება

წინ შემეცნების სიხარულით აღსავსე და საინტერესო ცხოვრება გელით - გიორგი მარგველაშვილი აბიტურიენტებს მიმართავს

საქართველოს პრეზიდენტი, გიორგი მარგველაშვილი აბიტურიენტებს მიმართავს.

როგორც პრეზიდენტის Facebook გვერდზე გავრცელებულ განცხადებაშია ნათქვამი, აბიტურიენტების ცხოვრებაში ყველაზე მნიშვნელოვანი და საპასუხისმგებლო დღეები დაიწყო.

„ძვირფასო აბიტურიენტებო, თქვენ ცხოვრებაში, შესაძლოა, აქამდე ყველაზე მნიშვნელოვანი და საპასუხისმგებლო დღეები დაიწყო.

მჯერა, რომ რა პროფესიაც არ უნდა აირჩიოთ მომავალში, თითოეული თქვენგანი იპოვის საკუთარ გზას ცხოვრებაში, ღირსეულ ადგილს საზოგადოებაში. ამავე დროს, ღრმად მწამს, რომ მეცნიერება და შემოქმედება, ახალი ცოდნის წარმოების პროცესი არის ის, რასაც თითოეული ქვეყნის განვითარება თუ მთლიანად კაცობრიობის წინსვლა ეფუძნება. ამიტომ, მთელი გულით გისურვებთ, რომ წარმატებით ჩააბაროთ გამოცდები და ახალი სასწავლო წლიდან უნივერსიტეტებში გააგრძელოთ იმ ცოდნის გაღრმავება, რომელსაც სკოლებში ეუფლებოდით.

მჯერა, რომ წინ შემეცნების სიხარულით აღსავსე და საინტერესო ცხოვრება გელით. რომ თქვენი შრომა ჩვენ ქვეყანას ისევე გამოადგება, როგორც თქვენ პირად წინსვლას. პატივისცემით, გიორგი მარგველაშვილი“,-ნათქვამია განცხადებაში.

დღეს, საქართველოს მასშტაბით ერთიანი ეროვნული გამოცდები დაიწყო, რომელიც 27 ივლისის ჩათვლით გაიმართება.

წელს სტუდენტის სტატუსის მოსაპოვებლად 39 ათასამდე აბიტურიენტი იბრძოლებს.

მონიკა დავლიანიძე