ეკონომიკა

წინა წელთან შედარებით 2017 წლის იანვარ-თებერვალში ბიზნეს სექტორში საშუალო თვიურმა ხელფასმა 1024 ლარი შეადგინა - საქსტატი

საქართველოს სტატისტიკის ეროვნული სამსახურის ინფორმაციით, ერთ წელიწადში ბიზნეს სექტორში 27.4 ათასი სამუშაო ადგილი შეიქმნა.

მონაცემების თანახმად, 2017 წლის პირველ კვარტალში ბიზნეს სექტორში დასაქმებულთა რაოდენობა 605 ათასი შეადგინა, რაც მეტია 2016 წლის პირველი კვარტლის მაჩვენებელზე - 577.6 ათასი. მაგრამ 2017 წლის იანვარ-თებერვალში წინა კვარტალთან შედარებით დასაქმების მაჩვენებელი 15.3 ათასით ნაკლებია.

დასაქმებულთა მთლიანი რაოდენობის 36% მსხვილ ბიზნესზე მოდის, 22,1% - საშუალო, ხოლო დარჩენილი 41,9% - მცირე ბიზნესზე. დაქირავებულთა მთლიანმა რაოდენობამ 570,9 ათასი კაცი შეადგინა, რაც გასულ წლის შესაბამის პერიოდზე 5.5%-ით მეტია.

2017 წლის პირველ კვარტალში საშუალო თვიურმა ხელფასმა ბიზნეს სექტორში 1024 ლარი შეადგინა, რაც 101.6 ლარით მეტია წინა წლის შესაბამის პერიოდთან შედარებით. ქალების საშუალო თვიურმა ხელფასმა 776,4 ლარი შეადგინა, რაც წინა წლის ანალოგიურ პერიოდთან შედარებით 89.3 ლარით გაიზარდა. საწარმოთა ზომის მიხედვით საშუალო თვიური ხელფასი შემდეგნაირია: მსხვილი ბიზნესი – 1154.9 ლარი, საშუალო ბიზნესი – 1133.4 ლარი, მცირე ბიზნესი – 827.9 ლარი.

2017 წლის პირველ კვარტალში ბიზნეს სექტორის ბრუნვის სტრუქტურაში 47% მოდის ვაჭრობის დარგზე (ავტომობილებისა და მოტოციკლების რემონტის ჩათვლით). მეორე ადგილს იკავებს დამამუშავებელი მრეწველობა 11,1%-იანი წილით, შემდეგ მოდის ხელოვნება, გართობა და დასვენება 8,1%-ითა და მშენებლობა - 7,8%-ით, დარჩენილი 26% სხვადასხვა დარგზე ნაწილდება.

ანა მებურიშვილი