კონფლიქტის ზონა

ცხედრის გადმოცემის გაჭიანურება იმისთვის ხდება, რომ ექსპერტიზამ გარდაცვალების გამომწვევი მიზეზები ვერ დაადგინოს - ომბუდსმენი

სახალხო დამცველის, ნინო ლომჯარიას შეფასებით, ოკუპირებული ძალები არჩილ ტატუნაშვილის ცხედრის გადმოცემას აჭიანურებენ, რათა შემდგომში გართულდეს მისი სიკვდილის გამომწვევი მიზეზების დადგენა.

„ალბათ, გარკვეულწილად მოსალოდნელიც იყო, რომ ცხინვალის მხარე და ოკუპანტი სახელმწიფო აგვიანებს ცხედრის გადმოცემას. ასეთ ფაქტს ჰქონდა ადგილი 2014 წელსაც, როცა საქართველოს მოქალაქის ცხედრის გადმოცემა იმდენად დაგვიანებით მოხდა, რომ ექსპერტიზის შედეგად ვერ დადგინდა მისი გარდაცვალების მიზეზი. ჩემი აზრით, ცხედრის გადმოცემის გაჭიანურება იმ მიზანს ემსახურება, რომ ექსპერტიზამ გარდაცვალების გამომწვევი მიზეზები ვერ დაადგინოს. ცდილობენ ცხედრის მაქსიმალურად დამალვას. ალბათ, საერთაშორისო მექანიზმების გზით უნდა მოვახდინოთ ზეწოლა რუსეთის ხელისუფლებაზე, რომ ცხედარი დროულად იყოს გადმოცემული", - თქვა ომბუდსმენმა.

ლომჯარიას თქმით, დაცული უნდა იყოს იმ მოქალაქეთა უფლებები, რომლებიც ვერ ახერხებენ საქართველოს მიერ კონტროლირებად ტერიტორიაზე გადმოსვლას.

„მაქსიმალულად, სამართლებრივი დახმარების გაწევითა თუ სხვა გზებით მათი უსაფრთხოება და ხელშეუხებლობა უნდა იყოს დაცული და თავი უნდა იგრძნონ დაცულად", - განაცხადა ომბუდსმენმა.

22 თებერვალს საოკუპაციო ძალებმა საქართველოს სამი მოქალაქე: არჩილ ტატუნაშვილი, ლევან ქუტაშვილი და იოსებ პავლიაშვილი ახალგორში დააკავა. მომდევნო დღეს ოსურმა მედიამ გაავრცელა ინფორმაცია ტატუნაშვილის სიკვდილის შესახებ.