საზოგადოება

წყნეთში მოსახლეობამ სტადიონზე კორპუსის მშენებლობა გააპროტესტა

დაბა წყნეთში მოსახლეობა სტადიონის ადგილას საცხოვრებელი კორპუსების მშენებლობას აპროტესტებს. მათი თქმით, სტადიონის შენარჩუნება ბავშვებისთვის მნიშვნელოვანია.

საპროტესტო აქციაზე სიტყვიერი დაპირისპირება მოხდა. ერთ-ერთი მოქალაქის, თინა ჯალაღონიას განცხადებით, მშენებლობა ამ ადგილს უფრო უსაფრთხოს გახდის, რასაც შეკამათება მოჰყვა.

აქციას ესწრებოდა საკრებულოს დამოუკიდებელი დეპუტატი ალეკო ელისაშვილი. მან განაცხადა, რომ გამწვანებული ზონების განადგურების ტენდენცია გრძელდება.

„აქ უკანონობაზე აღარაა საუბარი. ვხედავთ, როგორი შემზარავი სანახაობაა, ბულდოზერები როგორ ბრდღვნიან სტადიონს და ეს ხდება ჩვენ თვალწინ, 21-ე საუკუნეში. იმ დროს, როდესაც თითქოს ყველანი შეთანხმებული ვართ, რომ სტადიონებზე, სკვერებსა და პარკებში კორპუსები აღარ უნდა აშენდეს, მოსახლეობას ამ სტადიონის სანაცვლოდ არავინ არაფერს ჰპირდება. ძალიან გულდასაწყვეტია, რომ სტადიონების, სკვერებისა და პარკების განადგურების ტენდენცია გრძელდება და ეს არ უნდა მოხდეს“, - განაცხადა ელისაშვილმა.

ანა მებურიშვილი