უახლესი ამბები
არქივი
საზოგადოება
თსუ-ში აკაკი შანიძის 130 წლის იუბილე აღნიშნეს
ივანე ჯავახიშვილის სახელობის თბილისის სახელმწიფო უნივერსიტეტში აკაკი შანიძის დაბადებიდან 130-ე წლისთავისადმი მიძღვნილი საიუბილეო ღონისძიებები გაიმართა.
თსუ-ის რექტორის, გიორგი შარვაშიძის განცხადებით, უნივერსიტეტი იუბილეს რამდენიმე ღონისძიებით აღნიშნა. კერძოდ, გაიხსნა სამეცნიერო კონფერენცია, გაიმართა ფოტოგამოფენა „აკაკი შანიძე-130“, აგრეთვე შანიძის ნაშრომებისა და პერიოდიკაში დაბეჭდილი სტატიების პრეზენტაციაც.
თსუ-ის ჰუმანიტარულ მეცნიერებათა ფაკულტეტის დეკანმა, ნანა გაფრინდაშვილმა აკაკი შანიძის მიერ ქართულ მეცნიერებაში შეტანილ წვლილზე გაამახვილა ყურადღება.
„ის იყო დიდი ენათმეცნიერი, წარმატებით მუშაობდა რუსთველოლოგიაში, დიალექტოლოგიაში და კიდევ მრავალ სხვა დარგში, სადაც შექმნა ფუნდამენტური ნაშრომები. თსუ აგრძელებს აკაკი შანიძის ტრადიციებს, ჰუმანიტარულ მეცნიერებათა ფაკულტეტზე გრძელდება ის გზა, რომელიც აკაკი შანიძემ დაიწყო, ჩვენ სტუდენტებს ვთავაზობთ 130-მდე საგანს, რომლებითაც ვასწავლით ქართულ და ქართველურ ენებს და ამ საგნების შესწავლა შეუძლიათ არამარტო ჰუმანიტარულ მეცნიერებათა ფაკულტეტის სტუდენტებს, არამედ ეს საგნები შეუძლიათ აირჩიონ სტუდენტებმა ნებისმიერი ფაკულტეტიდან“, - განაცხადა გაფრინდაშვილმა.
შეგახსენებთ, აკაკი შანიძე ივანე ჯავახიშვილის სახელობის თბილისის სახელმწიფო უნივერსიტეტის ერთ-ერთი დამაარსებელი და პირველი პროფესურის წევრი იყო. მან წამოიწყო სამეცნიერო ხარისხის მოპოვება საქართველოში, ასევე წვლილი შეიტანა ქართული გრამატიკული აზრის განვითარების ისტორიაში. გარდა ამისა მუშაობდა შემდეგ სფეროებში: რუსთველოლოგია, ძველი ქართული ენა, ახალი ქართული ენა, ფოლკლორისტიკა, ლექსიკოლოგია-ლექსიკოგრაფია, ხელნაწერთმცოდნეობა, ქართული ენის ისტორია, ქართული ენის დიალექტოლოგია, უმწერლობო ქართველური ენები, არმენისტიკა, ალბანური ენა.
ანა მებურიშვილი