საზოგადოება

თსუ-ში ხვალ კონკურსში „გავუფრთხილდეთ მშობლიურ ენას!“ გამარჯვებულ მოსწავლეთა ესეების კრებულის პრეზენტაცია გაიმართება

20 აპრილს, 12.00 საათზე, ივანე ჯავახიშვილის სახელობის თბილისის სახელმწიფო უნივერსიტეტში მოძრაობა „არა ბარბარიზმებს“ საზოგადოებას წარუდგენს კონკურსში „გავუფრთხილდეთ მშობლიურ ენას“ გამარჯვებულ მოსწავლეთა ესეების კრებულს. ღონისძიება თსუ-ში ქართული ენის კვირეულის ფარგლებში გაიმართება.

კონკურსი 2018 წელს ჩატარდა უნივერსიტეტში და მასში მონაწილეობა მიიღო 32 სკოლის 400-მდე მოსწავლემ მთელი საქართველოს მასშტაბით. კონკურსანტებმა დაწერეს თხზულება თემაზე „რატომ უნდა გავუფრთხილდეთ მშობლიურ ენას“. საკონკურსო ჟიურის სკოლებმა განსახილველად გადასცეს მათ მიერ შერჩეული 125 ესეი, რომელთაგანაც ჟიურიმ გამოავლინა 20 გამარჯვებული მოსწავლე.

კონკურსის გამარჯვებულები 14 აპრილს დაჯილდოვდნენ თბილისის სახელმწიფო უნივერსიტეტში. კონკურსი მიეძღვნა თბილისის სახელმწიფო უნივერსიტეტის დაარსებიდან 100 წლისთავს.

კონკურსის საორგანიზაციო კომიტეტის გადაწყვეტილებით გამარჯვებული ესეები დაიბეჭდა კონკურსის კრებულში, რომელიც 2019 წელს გამოსცა თბილისის სახელმწიფო უნივერსიტეტის გამომცემლობამ.
ამავე დღეს, მოძრაობა „არა ბარბარიზმებს“ ანგარიშით წარსდგება საზოგადოების წინაშე ერთი წლის განმავლობაში გაწეული მუშაობისა და სამომავლო გეგმების შესახებ.

მისამართი: ი. ჭავჭავაძის გამზ. 1, თბილისის სახელმწიფო უნივერსიტეტის პირველი კორპუსის 115-ე აუდიტორია