პოლიტიკა

ცუდია, როდესაც ცესკო-ს თავმჯდომარეს თავად ცესკო-ს წევრები ირჩევენ, არათანაბარი პირობებია - ცესკო-ს თავმჯდომარეობის კანდიდატი მარიამ შელეგია

„ცუდია და საკანონმდებლო კაზუსია, როდესაც ცესკო-ს თავმჯდომარეს თავად ცესკო-ს წევრები ირჩევენ“,- ამის შესახებ ცენტრალური საარჩევნო კომისიის თავმჯდომარეობის კანდიდატმა მარიამ შელეგიამ პრესკონფერენციაზე განაცხადა.

შელეგიას განცხადებით, მისი არჩევის შემთხვევაში, მთავარი პრიორიტეტი არჩევნების ელექტრონული სისტემით ჩატარება იქნება.

გარდა ამისა, მან ცესკო-ს თავმჯდომარის არჩევის წესის ცვლილების აუცილებლობაზეც ისაუბრა.

„არჩევის წესი ცნობილია. ცესკო-ს თავმჯდომარეს ირჩევს ის 12 წევრი, რომლის თავმჯდომარეც არის თამარ ჟვანია. ცუდია და ეს საკანონმდებლო კაზუსია. ცუდია, როდესაც ცესკო-ს თავმჯდომარეს თავად ცესკო-ს წევრები ირჩევენ. არათანაბარი პირობებია. ბევრი რამ არის შესაცვლელი, თავად ეს საკითხიც უნდა შეცვლილიყო. ელექტრონული ხმის მიცემისა და ხმის დათვლის პროცედურებზე უნდა გადავიდეთ.

არჩევის შემთხვევაში, ცესკო-ში რეფორმების გატარებას ვაპირებ", - განაცხადა შელეგიამ.

ცესკო დღევანდელ სხდომაზე, რომელიც 14:00 საათზე გაიმართება, ახალ თავმჯდომარეს აირჩევს.

ცენტრალურმა საარჩევნო კომისიამ ცესკოს თავმჯდომარის არჩევის შესახებ გადაწყვეტილება სრული შემადგენლობის ორი მესამედით უნდა მიიღოს. ცესკოს თავმჯდომარის არჩევასთან დაკავშირებით კენჭისყრა ფარულია. სამივე კანდიდატს ერთდროულად ეყრება კენჭი.

პრეზიდენტმა სალომე ზურაბიშვილმა ცესკოს თავმჯდომარის თანამდებობაზე ასარჩევად მარიამ შელეგიას, თამარ ჟვანიასა და ვლადიმერ ბოჟაძის კანდიდატურები წარადგინა.