საზოგადოება

წვევამდელები იმ რეჟიმში ჩავაყენეთ, რომელშიც საკონტრატო სამხედრო მოსამსახურეები იმყოფებიან - ირაკლი სესიაშვილი

თავდაცვისა და უშიშროების კომიტეტის თავმჯდომარის, ირაკლი სესიაშვილის განცხადებით, მზად არის სამხედრო სარეზერვო სამსახურის შესახებ ახალი საკანონმდებლო პაკეტი, რომელიც პარლამენტს უახლოეს პერიოდში წარედგინება.

როგორც სესიაშვილმა პარლამენტის პლენარულ სხდომაზე განაცხადა, საკანონმდებლო პაკეტი ეფუძნება კონცეფციას, რომელიც პარტნიორებთან ერთად მომზადდა.

დეპუტატის ინფორმაციით, სწორი და ეფექტიანი რეფორმა შეეხო წვევამდელებს და ვადიან სამხედრო მოსამსახურეებს.

”საზოგადოებაში არსებობდა წუხილი, რომ ვადიანი სამხედრო მოსამსახურეები ნაკლებად დატვირთულ რეჟიმში ემსახურებოდნენ ქვეყანას. ჩვენც ვთლიდით, რომ აქ საჭირო იყო გარკვეული რეფორმის განხორციელება. ამიტომ წვევამდელებს შევთავაზეთ არამხოლოდ სოციალური პირობების გაუმჯობესება, არამედ ზუსტად იმ რეჟიმში ჩავაყენეთ, რომელშიც საკონტრატო სამხედრო მოსამსახურეები იმყოფებიან. ეს გულისხმობს იმას, რომ წვევამდელები გადიან პირველად სამხედრო მომზადებას, რომელიც არის ნატოს სტანდარტი და ერთ-ერთი გამორჩეული მომზადების პროგრამა. ჩვენი წვევამდელები საკონტრაქტო მოსამსახურეებთან ერთად გადიან ყველა იმ წვრთნასა და მომზადებას, როგორც ეს ძირითად საერთო არმიაში ხდება. ამასთანავე, წვევამდელები სარგებლობენ ზუსტად იმ რეჟიმით, როგორც საკონტრატო სამხედრო მოსამსახურეეები”, - განაცხადა სესიაშვილმა პარლამენტის პლენარულ სხდომაზე.