საზოგადოება

„თუ არ დაიცავენ კანონს, პოლიტიკურ სანაგვეზე მოხვდებიან“ - საკრებულოს შესასვლელთან ცარიელი ნაგვის ურნა დადგეს

საკრებულოსთან „ნაციონალური მოძრაობისა" და მოძრაობა „შეცვალეს" აქცია დასრულდა. ისინი საკრებულოში შესვლასა და თავმჯდომარესთან შეხვედრას ითხოვდნენ, თუმცა ეს ვერ შეძლეს. მათი მოთხოვნაა, „ქართულმა ოცნებამ" ლევან ხაბეიშვილზე ძალადობაში მონაწილე პირები უმრავლესობიდან გარიცხოს და მათ წინააღმდეგ გამოძიება დაიწყოს.

სამოქალაქო მოძრაობა "გაბედეს" და "შეცვალეს" წარმომადგენლებმა საკრებულოსთან ცარიელი ნაგვის ურნაც მიიტანეს, რომელიც საკრებულოს მთავარ შესასვლელთან დატოვეს და ოპონენტებს მიმართეს, რომ იმ შემთხვევაში, თუ ისინი არ დაიცავენ კანონს, პოლიტიკურ სანაგვეზე მოხვდებიან.

"ჩვენ აქ შევიკრიბეთ იმისთვის, რომ ჩვენი პარტიის როგორც საკრებულოს, ასევე პარლამენტის დეპუტატები შეხვედროდნენ ბატონ ტყემალაძეს და მისგან მოესმინათ უშუალოდ, თუ რას უპირებს იმ დეპუტატებს, რომლებიც რამდენიმე დღის წინ ჩვენს თანამებრძოლს, ლევან ხაბეიშვილს თავს დაესხნენ და ფიზიკურად გაუსწორდნენ. ჩვენ კარგად ვნახეთ, რომ ხაბეიშვილი ყოველდღე დადის გამოკითხვაზე პოლიციაში, და არცერთი ის ზონდერი დეპუტატი ჯერ არ დაუბარებიათ, რომელიც მონაწილეობდა უშუალოდ ამ თავდასხმაში.

პასუხი არ აქვთ, რატომ არ გვიშვებენ. ქვეყანა ივანიშვილმა, პრაქტიკულად დალუქა, შიგნიდან ჩაკეტა და იზოლაციაში მოაქცია საკუთარი ჩინოვნიკები. ჩემზე არაა საუბარი, ჩემზე საშვი იყო დაშვებული და არ შემიშვეს, მაგრამ პარლამენტის დეპუტატს, რომელსაც ნებისმიერ საჯარო დაწესებულებაში სრული თავისუფლება აქვს გადაადგილების, მასაც კი არ უშვებენ. ეს არის "ქართული ოცნება," შიგნიდან გამოკეტილი და ხალხისგან იზოლირებული,"- განაცხადა ზაალ უდუმაშვილმა.