საზოგადოება
თუ ისინი დამნაშავეები იყვნენ, ორი წლის განმავლობაში თავისუფლად რატომ დაიარებოდნენ თბილისსა და ხეობაში - მაჩალიკაშვილის დედა მთავრობას მიმართავს
სოფელ დუისში ჩატარებული სპეცოპერაციის დროს დაჭრილი თემირლან მაჩალიკაშვილის დედის, მედიკო მარგოშვილის ინფორმაციით, ისნის სპეცოპერაციის შედეგად დაკავებული და ლიკვიდირებული პირები 2 წლის განმავლობაში თავისუფლად ჩადიოდნენ პანკისის ხეობაში.
მარგოშვილმა მოითხოვა ხელისუფლებისგან განმარტება, რატომ იყო დაშვებული აჰმედ ჩატაევის დაჯგუფების წევრების გადაადგილება საქართველოში, თუკი ისინი ტერორისტები იყვნენ.
„იმ ბიჭებს მეც ვიცნობდი, მაშინ ჩემთვისაც გაეხვრიტათ შუბლი. მე მთავრობისგან ვითხოვ, თუ ასეთი დამნაშავეები არიან, მთელი ორი წლის განმავლობაში თავისუფლად რატომ დაიარებიან თბილისსა და ხეობაში. მე იმათგან ვითხოვ პასუხს“, - განაცხადა მედიკო მარგოშვილმა.
19 წლის თემირლანის დედა ასევე გამოეხმაურა ჯანდაცვის სამინისტროს ინფორმაციას, რომ მაჩალიკაშვილის მიღებაზე გერმანულმა კლინიკამ „შარიტემ“ უარი განაცხადა. მარგოშვილის მტკიცებით, თავიდან კლინიკა გადახდის სანაცვლოდ მაჩალიკაშვილის მკურნალობაზე თანახმა იყო, თუმცა მთავრობამ უარი ათქმევინა.
„პირადად დაველაპარაკეთ ბერლინს. ხომ დაინახეთ მოგვივიდა ინვოისი, ვიღებთ პაციენტს ოღონდ თქვენ გადაიხადეთ. გავუგზავნეთ სამინისტროს, სამინისტრომ როგორც კი ეს გაიგო 9-ის 14 წუთს მომწერეს მეილზე, უარს ვაცხადებთო ადგილების უქონლობის გამო. ეს ხომ აბსურდია. ეს ამათ ათქმევინეს, მთავრობამ კლინიკას ათქმევინა უარი“, -თქვა თემირლან მაჩალიკაშვილის დედამ.
თემირლან მაჩალიკაშვილი 26 დეკემბერს, პანკისის ხეობაში ჩატარებული სპეცოპერაციის დროს დაჭრეს. ამ დრომდე მისი ჯანმრთელობის მდგომარეობა მძიმეა.
პანკისსა და თბილისში ჩატარებული სპეცოპერაციის დროს სუსმა 5 პირი დააკავა. თბილისის საქალაქო სასამართლომ მათ პატიმრობა შეუფარდა.
ბრალდების მიხედვით, დაკავებულები, სავარაუდოდ, ახმედ ჩატაევის მოკავშირეები იყვნენ, ისინი დაეხმარნენ ჩატაევს საქართველოს საზღვარზე გადმოსვლასა და თბილისში ბინის ქირაობაში, სადაც 21-22 ნოემბერს სპეცოპერაცია ჩატარდა.
სუსის ცნობით, დაკავებული პირები 21-22 ნოემბრის სპეცოპერაციის დროს მოკლულ ჯგუფთან ერთად, საქართველოსა და თურქეთში ტერაქტებს გეგმავდნენ. ასევე იგეგმებოდა თავდასხმები საქართველოში მომუშავე დიპლომატიურ კორპუსებზე.
ანა მებურიშვილი