საზოგადოება
თუ მოსმენების შესახებ კანონი ამ სახით შევა, ან უნდა ვიმოქმედოთ კანონგარეშე, ან უნდა წავიდეთ სახლში - ბესიკ წაქაძე
მცირე და საშუალო ინტერნეტპროვაიდერების ასოციაციის წევრის, ბესიკ წაქაძის თქმით, თუკი მოსმენების შესახებ კანონი ამ ფორმით შევა ძალაში, კომპანიები მათ მიერ დაკისრებულ გადასახედებს ვერ გადაიხდიან.
„როგორც კი ეს კანონპროექტი იმ სახით შევა ძალაში, რასაც ჩვენ ვიცით ამჟამად, ეს გამოიწვევს ფინანსურ ნაწილში ჩვენს დაჯარიმებას, რომელიც არის კოლოსალური თანხები. მოგეხსენებათ ჩვენი ბრუნვები, შესაბამისად, ჯარიმებს ვერ გადავიხდით. ან უნდა ვიმოქმედოთ კანონგარეშე, რაც ბოლოს ისევ დაჯარიმებით დასრულდება, ან დღესვე უნდა დავიხუროთ ქუდი და წავიდეთ სახლში“, - თქვა ბესიკ წაქაძე.
ინტერნეტპროვაიდერები საუბრობენ კანონის იმ მუხლზე, რომელიც ავალდებულებს კომპანიებს, თავად შეიძინონ მოსმენებისთვის განკუთვნილი ტექნიკა.
შეგახსენებთ, რომ ქუთაისის პარლამენტში მიმდინარეობს პლენარული სხდომა მოსმენების კანონის შესახებ.
ანა მებურიშვილი