საზოგადოება

თუ ქეთი დოლიძის დაპატიჟება ჩაიზე ძალაშია, უარს არ ვიტყვი ნამდვილად - მიხეილ გიორგაძე

მიხეილ თუმანიშვილის სახელობის კინომსახიობთა თეატრის

სამხატვრო ხელმძღვანელის თანამდებობაზე მინისტრის ბრძანებით ქეთი დოლიძე გიორგი სიხარულიძემ შეცვალა.

როგორც კულტურისა და ძეგლთა დაცვის მინისტრმა საკითხის კომენტირებისას ჟურნალისტებს განუცხადა, გადაწყვეტილების მიღებისას ყურადღება, პირველ რიგში მიექცა ადმინისტრირებას, საორგანიზაციო საკითხებს და მენეჯმენტს.

„არ ვარჩევთ იმას, რამდენად მოგვწონს ან არ მოგვოწონს ვინმეს დადგმული სპექტაკლი. ჩვენ ვირჩევთ საჯარო სამართლის იურიდიულ პირებს, რომლებსაც ევალებათ პირველ რიგში ადმინისტრირება, საორაგანიზაციო საკითხები და შესაბამისი დაწესებულებების მენეჯმენტი. ამ ნაწილში, როგორც ავღნიშნე, კატასტროფული უუნარობა და არაკომპეტენტურობა წარმოაჩინა წინა ხელმძღვანელობამ“,-აღნიშნა გიორგაძემ.

რაც შეეხება ინფორმაციას, რომ ქეთი დოლიძემ მინისტრს შეტყობინება გაუგზავნა, რომელშიც ჩაიზე ეპატიჟება, მიხეილ გიორგაძემ თქვა, რომ თუ ეს წინადადება ძალაშია, იგი მზად არის შეხვდეს ქეთი დოლიძეს.

„ცოტა არასერიოზული მგონია მთელი ეს საუბარი. აქ საბავშვო ბაღი არ არის და განაწყენება დაზავებაზე საუბარი აბსოლუტურად უადგილოა. გადაწყვეტილებები, რომელიც სამინისტროში მიიღება, არც არავის პირად დამოკიდებულებაზე არ არის დაფუძნებული და არც არავის წყენაზე. საუბარი მასთან არ მქონია, მესიჯი ნამდვილად მივიღე, თუ ახლა ჩაიზე გპატიჟებს ადამიანი და თუ ეს დაპატიჟება ძალაშია, უარს არ ვიტყვი ნამდვილად, თუნდაც იმიტომ, რომ ვინმემ არ ჩათვალოს, რომ გაბუტული ვარ და რაღაც პირადი მიუღებლობა მაქვს ამ ადამიანის მიმართ“,-აღნიშნა მინისტრმა.

მონიკა დავლიანიძე