პოლიტიკა

თუ რუსეთის ვიზების ცენტრის გახსნა დამატებით კომფორტს შეუქმნის ჩვენს მოქალაქეებს, ჩვენ მხოლოდ მივესალმებით - მამუკა ბახტაძე

საქართველოს პრემიერ-მინისტრის, მამუკა ბახტაძის განცხადებით, მთავრობა მიესალმება თბილისში რუსეთის სავიზო ცენტრის გახსნას იმ შემთხვევაში, თუკი ეს საქართველოს მოქალაქეებს კომფორტს შეუქმნის.

„ბუნებრივია, ეს უნდა იყოს იმ საკანონმდებლო ჩარჩოს ფარგლებში, რომელიც დღეს არის საქართველოში და ასეც გახლავთ. დარწმუნებული ვარ, დეტალურ კომენტარს საგარეო საქმეთა მინისტრი დავით ზალკალიანი გააკეთებს.

თუ ეს დამატებით კომფორტს შეუქმნის ჩვენს მოქალაქეებს, ჩვენ მხოლოდ მივესალმებით“, – განაცხადა ბახტაძემ.

დღეს თბილისში რუსული ვიზების ცენტრი იხსნება, რომელიც ბესიკის ქუჩა N4-ში, „ბიზნეს ცენტრი ბესიკზე“ შენობაში განთავსდება. მისი მიზანი საქართველოს მოქალაქეებისთვის დოკუმენტების გაფორმების პროცედურის დაჩქარებაა.

ცენტრი მოქალაქეებისგან ვიზის გასაფორმებლად საჭირო დოკუმენტებს მიიღებს, შეაგროვებს და სექციაში ჩააბარებს, სადაც უკვე მიიღებენ ვიზის გაცემის გადაწყვეტილებას. ცენტრის გახსნით საქართველოს მოქალაქეები ვიზის მიღებას შუამავლების გარეშე შეძლებენ.