პოლიტიკა
თუ უკრაინაში არ შემიშვებენ, აეროპორტში ვიცხოვრებ - მიხეილ სააკაშვილი მოქალაქეობის ჩამორთმევაზე
საქართველოს ექს-პრეზიდენტისა და ოდესის ყოფილი გუბერნატორის მიხეილ სააკაშვილის განცხადებით, მისთვის უკრაინის მოქალაქეობის ჩამორთმევის საკითხს ის ადმინისტრაციულ სასამართლოში გაასაჩივრებს.
ამის შესახებ მან „უკრაინულ პრავდასთან“ ინტერვიუში განაცხადა.
„ჩვენ წავალთ ადმინისტრაციულ სასამართლოში. თუკი იქ არ გამოვა, სტრასბურგში წავალთ“, - უთხრა სააკაშვილმა „უკრაინულ პრავდას“.
სააკაშვილის თქმით, პეტრო პოროშენკოსთვის ბოლო წვეთი აღმოჩნდა სააკაშვილის მიერ „საერთო მოქმედების შტაბის“ ამოქმედება.
„რეალურად ამბობდნენ, რომ რაღაც სიმღერაა იყო მიზეზი, მაგრამ ეს სისულელეა. ვფიქრობ, პოროშენკოსთვის ბოლო წვეთი გახდა, რომ ხალხის გაერთიანება დავიწყე „საერთო მოქმედების შტაბში“ და ამის შეეშინდა“, - თქვა სააკაშვილმა.
სააკაშვილმა არ გამორიცხა , რომ პოროშენკომ ეს გადაწყვეტილება უკრაინელი ბიზნესმენის, რინატ ახმეტოვის რჩევით მიიღო.
ოდესის ყოფილი გუბერნატორის თქმით, მან უკრაინაში ყველა შესასვლელი და გასასვლელი იცის, მაგრამ თუკი უკრაინაში არ შეუშვებენ, „ბორისპოლის“ აეროპორტში „დაბინავდება“.
„ვიცხოვრებ „ბორისპოლის“ აეროპორტის სატრანზიტო ზონაში. იქ კარგი რემონტი გააკეთეს, ჩემი მეგობარია დირექტორი. იმედია, რამე მყუდრო ადგილს მომინახავს. ვხუმრობ, მაგრამ შესაძლებლობას მოვინახავ“, - განაცხადა სააკაშვილმა.
26 ივლისს გახდა ცნობილი, რომ მიხეილ სააკაშვილს უკრაინის მოქალაქეობა ჩამოართვეს. უკრაინის პრეზიდენტის ადმინისტრაციის ინფორმაციით, ამის მიზეზი მოქალაქეობაზე განაცხადის შევსებისას არასწორი ინფორმაციის მიწოდება გახდა.
ანა მებურიშვილი