კომენტარი
თუ ვამბობთ, რომ გიორგი გაბუნიას აქვს სიტყვის თავისუფლება, ასევე საპატრიარქოს შეიძლება ჰქონდეს თავისი აზრის გამოხატვის უფლება - სოფიო კილაძე
მედია არის თავისუფალი და გარანტირებული, მაგრამ თუ ვამბობთ, რომ გიორგი გაბუნიას აქვს თავისი სიტყვის თავისუფლება, ასევე საპატრიარქოს და მის წარმომადგენლებს შეიძლება ჰქონდეთ თავისი აზრის გამოხატვის უფლება,- განაცხადა პარლამენტის ადამიანის უფლებათა დაცვისა და სამოქალაქო ინტეგრაციის კომიტეტის თავმჯდომარემ, სოფიო კილაძემ და აქვე დასძინა, რომ გამორიცხავს, ხელისუფლების მხრიდან ყველანაირ ზეწოლას „რუსთავი 2-ის“ მიმართ.
საპარლამენტო უმრავლესობის წევრი ღვთისმშობელთან დაკავშირებით გადაცემა „არჩევანის“ წამყვანის კომენტარს და საპატრიარქოს განცხადებას გამოეხმაურა, სადაც საპატრიარქო „რუსთავი 2-ს“ ბოიკოტს უცხადებს.
სოფო კილაძემ რელიგიური გრძნობების შეურაცხყოფასთან დაკავშირებით საკანონმდებლო ინიციატივაზეც ისაუბრა.
„ჩვენთან იყო შემოსული კონკრეტული საკანონმდებლო ინიციატივა რელიგიური გრძნობების შეურაცხყოფასთან დაკავშირებით და ამაზე ვთქვით, რომ ამ ფორმით ამ კანონს მხარს ვერ დავუჭერდით იმიტომ, რომ სუბიექტური ინტერპრეტირების შესაძლებლობას იძლეოდა. ჩვენ კონკრეტული არგუმენტების გათვალისწინებით და სხვადასხვა მნიშვნელოვანი საკითხის გათვალისწინებით, ნებისმიერ საკითხთან მიმართებით რაღაც გადაწყვეტილება უნდა მივიღოთ,“- განაცხადა სოფო კილაძემ.