საზოგადოება

თურქეთის საელჩოსთან აქცია გაიმართა

თურქეთის საელჩოსთან სამოქალაქო საზოგადოების წარმომადგენლებისა და უფლებადამცველების აქცია-ბრიფინგი გაიმართა. მათ გააპროტესტეს თურქეთის პრეზიდენტის განცხადება, სადაც რეჯეპ თაიფ ერდოღანმა თურქეთის საზღვრებზე საუბრისას ბათუმი და მეზობელი ქვეყნების სხვა ქალაქები ახსენა.

,,უფლებადამცველთა გაერთიანების“ თავმჯდომარის, ნიკოლოზ მჟავანაძის განცხადებით, ეს პირველი შემთხვევა არაა, როცა თურქეთის ხელისუფლება მინიშნებას აკეთებს, რომ თურქეთს აქვს პრეტენზიები აჭარასთან მიმართებაში და საქართველოს ხელისუფლებამ მსგავსი განცხადებების წინააღმდეგ ყველანაირი მექანიზმი უნდა გამოიყენოს.

,,ეს განცხადება რომ რუსეთის მხრიდან გაკეთებულიყო, მას აუცილებლად მოყვებოდა რეაქციები. თუმცა ჩვენ ვნახეთ, რომ ამ კონკრეტულ შემთხვევაში საქართველოს ხელისუფლებამ არაფერი გააკეთა, მაშინ როდესაც საბერძნეთში მსგავსი ტიპის განცხადებას მოჰყვა მყისიერი რეაგირება. მნიშვნელოვანია, რომ ჩვენმა ხელისუფლებამ, საგარეო საქმეთა სამინისტრომ აამოქმედოს ყველანარი ბერკეტი, რომელიც მსგავსი ტიპის განცხადებებს დაუპირისპირდება. იმ შემთხვევაში, თუ ხელისუფლება „სირაქლემის პოზაში“ გააგრძელებს ყოფნას, აქციები გაგრძელდება და ჩვენ გადავინაცვლებთ საგარეო საქმეთა სამინისტროსთან”, - განაცხადა ნიკოლოზ მჟავანაძემ.

ინფორმაცია თურქეთის პრეზიდენტის განცხადების შესახებ ბერძნულმა მედიამ გაავრცელა, რომლის მიხედვითაც, რეჯეპ თაიფ ერდოღანმა ერთ-ერთი ღონისძიებაზე სიტყვით გამოსვლისას განაცხადა, რომ 1920 წელს, თურქეთის საზღვრების შესახებ მიღებული პაქტი მოიცავდა კვიპროსს, ალეპოს, მოსულს,
ერბილს, კურკუკს, ბათუმს, სალონიკს და სხვა ტერიტორიებს.

მარი ნამგალაძე