საზოგადოება

თურქეთში სარფის საბაჟოზე საქართველოს მოქალაქის ცემის ფაქტზე სასამართლო პროცესი გაიმართება

სარფის საბაჟო-გამშვებ პუნქტზე საქართველოს მოქალაქის როინ ლეონიძის ცემის ფაქტთან დაკავშირებით დღეს თურქეთის ქალაქ ხოფში სასამართლო პროცესი გაიმართება.

ლეონიძის მეუღლის, ინეზა დევაძის განცხადებით, ჯერ ცნობილი არაა, რომელ საათზე გაიმართება სასამართლო. მისი თქმით, ლეონიძის მდგომარეობა სტაბილურია, თუმცა სიარული უჭირს.

„ახლა მოვიდა თურქეთის საკონსულოც, საქართველოს საკონსულოც, შეხვედრა იქნება, გაიმართება მოალაპარკებები. გუშინ გვითხრეს, რომ სასამართლო პროცესზე 11 საათისთვის უნდა მოვილაპარაკოთ და გადავწვიტოთ. ჯერჯერობით არ ვიცით, როდის იქნება. ჩემი მეუღლის მდგომარეობა არც ისე მძიმეა, მაგრამ გუშინ ღამით გამაყუჩებლებზე იყო, ტკივილები ჰქონდა, სიარულით დადის, მაგრამ უჭირს“, - განუცხადა დევაძემ „მოამბეს“.

სახალხო დამცველის აპარატის წარმომადგენლის ციალა ქათამაძის განცხადებით, ლეონიძეს სახეზე დაზიანებები აღენიშნება.

„მას სახეზე აღენიშნებოდა გარკვეული ტიპის დაზიანებები და ჩვენს წარმომადგენელთან საუბარში მან აღნიშნა, რომ საბაჟოზე ჰქონდა ცემის ფაქტს ადგილი“, - განაცხადა ქათამაძემ.

37 წლის როინ ლეონიძე ამ დრომდე ხოფის საავამდყოფოში იმყოფება.

შეგახსენებთ, რომ გუშინ გავრცელებული ინფორმაციით, ლეონიძე მეუღლესთან ერთად თურქეთში გადადიოდა. მებაჟემ მას „ნიფტალი“ ( თურქეთში შესვლის ერთდღიანი აკრძალვა) ჩაურტყა, რასაც მოჰყვა სიტყვიერი შეურაცხყოფა. თვითმხილველთა განცხადებით, ლეონიძე 4-მა თურქმა მებაჟემ სცემა. ამ ფაქტის გასაპროტესტებლად ადგილობრივმა მოსახლეობამ აქცია გამართა. აქციის მონაწილეთა თქმით, მსგავსი შემთხვევები თურქი მებაჟეების მხრიდან ხშირად ხდება და დახმარებას ითხოვენ მთავრობისგან.

საგარეო საქმეთა სამინისტრომ თურქ სამართალდამცავებზე დაყრდნობით გაავრცელა ინფორმაცია, რომ საქართველოს მოქალაქე ნასვამ მდგომარეობაში თურქ პოლიციელს სიტყვიერი და ფიზიკური შეურაცხყოფა მიაყენა. თურქი სამართალდამცავების ინფორმაციით, როგორც თურქი პოლიციელი, ასევე საქართველოს მოქალაქე გაივლიან სამედიცინო შემოწმებას და შემდგომ დაიკითხებიან პროკურატურაში.

ანა მებურიშვილი