საზოგადოება

თურქული გაზეთის დამატება სავარაუდოდ შეთანხმებული იქნებოდა თურქეთის ხელისუფლებასთან - მამუკა არეშიძე

ექსპერტ მამუკა არეშიძის განცხადებით, ისეთი გავლენიანი გაზეთი, როგორიც „საბაჰია“, ხელისუფლებასთან შეთანხმების გარეშე გაზეთის დამატებას არ გამოუშვებდა. ამის შესახებ მამუკა არეშიძემ თურქეთის ყოველდღიური გაზეთის ,,საბაჰი“ დანამატად გაზეთ „აბხაზიას“ გამოცემასთან დაკავშირებით განაცხადა.

არეშიძის შეფასებით, საკითხზე ქართული დიასპორის რეაქცია ძალიან მწვავე იყო.

,,ამ საკითხზე ქართული დიასპორის რეაქცია იყო ძალიან მწვავე. გაზეთის დამატება, რომელიც თურქეთში აფხაზეთის დიასპორისთვის გამოვიდა, სავარაუდოდ შეთანხმებულია თურქეთის ხელისუფლების რაღაც ჯგუფთან. ისეთი გავლენიანი გაზეთი, როგორიცაა „საბაჰი“ ხელისუფლებასთან შეთანხმების გარეშე არაფერს დაბეჭდავდა“, - განაცხადა მამუკა არეშიძემ დღეს გამართულ პრესკონფერენციაზე და აღნიშნა, რომ დამატებას ერთჯერადი ხასიათის არ იქნება.

ინფორმაცია „აბხაზიას“ თურქული გაზეთის დანამატად გამოცემასთან დაკავშირებით ,,იმედის დრომ“ გაავრცელა. როგორც „იმედს“ საკითხის კომენტირებისას თურქეთში საქართველოს ელჩმა ირაკლი კოპლატაძემ განუცხადა, თურქეთის საგარეო საქმეთა სამინისტრო თავადაც შეშფოთებულია ფაქტით.

,,ჩვენ დავუკავშირდით თურქულ მხარეს, თურქეთის საგარეო საქმეთა სამინისტროს, თურქეთის ხელისუფლებას და მკაფიოდ და მყისიერად დავაფიქსირეთ ჩვენი პოზიცია აღნიშნულთან დაკავშირებით. ამჟამად ვმუშაობთ თურქეთის საგარეო საქმეთა სამინისტროსთან ერთად და გულახდილად უნდა ვთქვა, რომ თვითონაც ძალიან შეშფოთებულია ფაქტთან დაკავშირებით, რადგან ეს ფაქტი ეწინააღმდეგება ოფიციალური ანკარის გაცხადებულ პოზიციას საქართველოს ტერიტორულ მთლიანობასთან და სუვერენიტეტთან დაკავშირებით“, - განაცხადა კოპლატაძემ.

მარი ნამგალაძე