საზოგადოება
თურქულმა სასამართლომ თურქი მებაჟეების მიერ ნაცემი საქართველოს მოქალაქე დაზარალებულად ცნო
სახალხო დამცველის აპარატის წარმომადგენლის ციალა ქათამიძის განცხადებით, თურქეთის ქალაქ ხოფის სასამართლომ საქართველოს მოქალაქე როინ ლეონიძე, რომელმაც სარფის თურქ მებაჟეებს მის ფიზიკურ შეურაცხყოფაში დაადანაშაულა, დაზარალებულად ცნო.
„ცოტა ხნის წინ დასრულდა მოსმენა. როგორც საკონსულოს წარმომადგენლებმა ჩვენთან საუბარში აღნიშნეს, საქართველოს მოქალაქე დაზარალებულადაა ცნობილი. დამატებით დეტალებს ისევ საკონსულოსთან გავივლით“, - გაანცხადა ციალა ქათამიძემ.
შეგახსენებთ, რომ გუშინ გავრცელებული ინფორმაციით, ლეონიძე მეუღლესთან ერთად თურქეთში გადადიოდა. მებაჟემ მას „ნიფტალი“ ( თურქეთში შესვლის ერთდღიანი აკრძალვა) ჩაურტყა, რასაც მოჰყვა სიტყვიერი შეურაცხყოფა. თვითმხილველთა განცხადებით, ლეონიძე 4-მა თურქმა მებაჟემ სცემა. ამ ფაქტის გასაპროტესტებლად ადგილობრივმა მოსახლეობამ აქცია გამართა. აქციის მონაწილეთა თქმით, მსგავსი შემთხვევები თურქი მებაჟეების მხრიდან ხშირად ხდება.
ინციდენტის შემდეგ ლეონიძე თურქეთის ქალაქ ხოფის საავადმყოფოში გადაიყვანეს. დღეს კი სასამართლო მოსმენა გაიმართა ამ საქმეზე.
ანა მებურისვილი