საზოგადოება

თვის ბოლოსთვის გამოიკვეთება კონტურები სამომხმარებლო ტარიფთან მიმართებაში - ირინა მილორავა

დღეს მოქმედ ტარიფში ჩადებულია კურსი 2.50 ლარი, ამდენად არსებითი გავლენა კურსის გამო ჯერჯერობით არ იგეგმება, - განაცხადა ენერგეტიკისა და წყალმომარაგების მარეგულირებელი კომისიის თავმჯდომარემ ირინა მილორავამ სემეკის დღევანდელი სხდომის დაწყებამდე, რომელზეც ელექტოროენერგეტიკულ სექტორში 13 კომპანიისა და წყალმომარაგების სექტორში მოქმედი 3 კომპანიისთვის 2018-2020 წლების საინვესტიციო გეგმების დამტკიცების საკითხს განიხილავენ.

"ელექტროენერგეტიკულ სექტორში კომპანიების მიერაა წარმოდენილი დაახლოებით, მილიარდამდე ლარის ინვესტიცია. ეს მოიცავს ინვესტიციებს გამანაწილებელ, გადამცემ ქსელებში და ასევე გენერაციის ობიექტებში. ასევე აქვთ საინვესტიციო გეგმები წარმოდგენილი წყალმომარაგების ლიცენზიანტებს.

მოგეხსენებათ, რომ ინვესტიციები არის ერთ-ერთი ძალიან მნიშვნელოვანი კომპონენტი განაწილების, გენერაციის ტარიფებში და ბუნებრივია, მათი გავლენა სამომხმარებლო ტარიფებზე მოგვიანებით იქნება შეფასებული", - განაცხადა მილორავამ.

მისი თქმით, დღეს შეუძლებელია იმაზე საუბარი, თუ რა მოუვა სამომხმარებლო ტარიფს.

"მართალია ინვესტიციები ზოგადად ძალიან მნიშვნელოვანი კომპონენტია ტარიფში, მაგრამ არა ერთადერთი. მომავალი კვირიდან ჩვენ დავიწყებთ სატარიფო სხდომებს თითოეული კომპანიის მიხედვით და შესაბამისად, უკვე თვის ბოლოსთვის გამოიკვეთება კონტურები სამომხმარებლო ტარიფთან მიმართებაში. ერთი რამ შემიძლია გითხრათ, დღევანდელ არსებულ მოქმედ ტარიფში ჩადებულია კურსი 2 ლარი და 50 თეთრი, ამდენად არსებითი გავლენა კურსის გამო, ჯერჯერობით არ იგეგმება", - განაცხადა მილორავამ.

ნინო ექვთიმიშვილი