საზოგადოება

უკეთესი იქნება თუ ნაციონალური მოძრაობა პარტიის ოფისში დაიბარებს იმ მინისტრებს, რომლებმაც დაკარგეს ტერიტორიები - თეა წულუკიანი

საქართველოს იუსტიციის მინისტრის, თეა წულუკიანის განცხადებით, უკეთესი იქნება თუ ნაციონალური მოძრაობა პარტიის ოფისში დაიბარებს ის მინისტრებს, რომლებმაც 2008 წელს დაკარგეს ტერიტორიები.

ამის შესახებ წულუკიანმა სალომე სამადაშვილის მოთხოვნის კომენტირებისას განაცხადა, რომლის მიხედვით, „ნაციონალურ მოძრაობას“ შეკითხვები აქვს იმასთან დაკავშირებით, რომ ქართულმა მხარემ რუსეთს ხანძრის ჩაქრობის თხოვნით მიმართა.

სამადაშვილის თქმით, „აუცილებელია გამოცხადნენ ხელისუფლების წარმომადგენლები პარლამენტში“.

„უმჯობესი იქნება, რომ ნაციონალურმა მოძრაობამ თავისი ის ყოფილი მინისტრები და უმაღლესი ხელისუფლების პირები დაიბაროს პარტიის ოფისში და მოკითხოს პასუხი, რომლებმაც 2008 წლის ავბედითი ომის დროს დაკარგეს ტერიტორიბის უმრავლესობა.

მთავრობამ მოახერხა ის, რომ არ არის ადამიანური დანაკლისი, ის საფრთხე რომელიც სოფლებს ემუქრებოდა იქნა თავიდან აცილებული. ეს არის სწორედ, ამ მთავრობის, პრემიერ- მინისტრის და თითოეული მაშველის დამსახურება. თუკი ეს არ მოსწონს ოპოზიციას, ეს მათი პრობლემაა“,-აღნიშნა მინისტრმა.

მონიკა დავლიანიძე