საზოგადოება

უკლებლივ ყველა სკოლაში ფსიქოლოგები იმუშავებენ - მიხეილ ჩხენკელი

დღეს ვხვდები ფსიქოლოგებსა და ბავშვთა უფლებებზე მომუშავე ორგანიზაციების წარმომადგენლებს - სწორედ ერთობლივი ძალისხმევით აუცილებლად მივაღწევთ იმას, რომ უკლებლივ ყველა სკოლა მაქსიმალურად უსაფრთხო გახდეს და მსგავსი ტრაგედია აღარასდროს განმეორდეს, - განაცხადა განათლებისა და მეცნიერების მინისტრმა მიხელ ჩხენკელმა დღევანდელ პრესკონფერენციაზე.

მისი ინფორმაციით, სისტემაში დაინერგება კონფლიქტების მართვის, პრევენცია-მედიაციის პროგრამები, რისთვისაც პროფესიონალებთან ერთად იმუშავებენ ფსიქოლოგიის სპეციალობის მაგისტრანტები და დოქტორანტები.

ჩხენკელის განცხადებით, პროცესში ჩართულები იქნებიან ასევე მშობლებიც.

„განათლებისა და შინაგან საქმეთა სამინისტროების ერთობლივი ჯგუფი ასევე იმუშავებს არასრულწლოვნებისთვის ფსიქოლოგიური და საკონსულტაციო სერვისების უზრუნველყოფაზე, დაინერგება კონფლიქტების მართვის, პრევენცია-მედიაციის პროგრამები. 24 საათიან რეჟიმში იმუშავებს ფსიქოლოგიური სამსახურის ცხელი ხაზი. ქვეყნის უკლებლივ ყველა სკოლა რომ მოვიცვათ, პროცესში, პროფესიონალებთან ერთად, ჩართულები იქნებიან უმაღლესი სასწავლებლების ფსიქოლოგიის სპეციალობის მაგისტრანტები და დოქტორანტები. განსაკუთრებულ მნიშვნელობას ვანიჭებთ ამ პროცესში მშობლების აქტიურ მონაწილეობას. ეს გულისხმობს, როგორც ერთი მხრივ, მშობლების ინტენსიურ ჩართულობას სკოლის ცხოვრებაში, ასევე, მათთვის საჭირო საინფორმაციო-საკონსულტაციო მომსახურების შეთავაზებას. ჩვენ არა მხოლოდ დანაშაულის პრევენციაზე უნდა ვიზრუნოთ, არამედ, უპირველეს ყოვლისა ისეთი ვითარების ფორმირებაზე, სადაც ძალადობა და აგრესია დაუშვებელია.

მჯერა, რომ რაც არ უნდა რთულად გვეჩვენებოდეს ეს, ჩვენ სწორედ ამ მიზნისკენ უნდა ვიმოძრაოთ“, - განაცხადა მიხეილ ჩხენკელმა.

ნინო ექვთიმიშვილი