პოლიტიკა

უკრაინამ რუსეთს გია ცერცვაძის გადაცემაზე უარი უთხრა

უკრაინის გენერალურმა პროკურატურამ რუსეთს საქართველოს მოქალაქის გია ცერცვაძის გადაცემაზე უარი უთხრა. ამის შესახებ რადიო თავისუფლება იტყობინება.

რადიო თავისუფლების ინფორმაციით, შესაბამისი წერილი ცერცვაძის ადვოკატმა მედიას წარუდგინა.
ადვოკატ კსენია პროკონოვას თქმით, ჩვეულებრივ, ამგვარ ვითარებაში, უკრაინა თანხმდებოდა ხოლმე ექსტრადიციას.

მისი თქმით, „ეს ნიშნავს, რომ ჩვენ შევქმენით პრეცედენტი, არ გადავეცით სახელმწიფოს, რომელთანაც ომი გვაქვს, მეომარი, რომელიც უკრაინის მხარეს იბრძოდა. და მეორე: მას შეეძლება კანონიერად დარჩეს უკრაინაში, იცხოვროს, იმუშაოს და გააგრძელოს ის, რისთვისაც ჩამოვიდა“.

ადვოკატის თქმით, გია ცერცვაძე უკრაინის მოქალაქეობის მისაღებად განცხადების შეტანას აპირებს.

ასევე, სურს საბრძოლო მოქმედებათა ზონაში დაბრუნება და უკრაინის დასაცავად ბრძოლა.

გია ცერცვაძე კიევის აეროპორტში 15 იანვარს დააკავეს, თუმცა დროებითი პატიმრობიდან 27 იანვარს გაათავისუფლეს.