პოლიტიკა
უკრაინაში საქართველოს ელჩმა უკრაინის საგარეო საქმეთა მინისტრის მოადგილეს რწმუნებათა სიგელების ასლები გადასცა
საქართველოს ახლადდანიშნულმა ელჩმა უკრაინაში გელა დუმბაძემ, უკრაინის საგარეო საქმეთა მინისტრის მოადგილეს ევროპული ინტეგრაციის საკითხებში ოლენა ზერკალს რწმუნებათა სიგელების ასლები გადასცა. რწმუნებათა სიგელების ასლების გადაცემის შემდეგ გაიმართა შეხვედრა, რომელზეც მხარეებმა ისაუბრეს საქართველოსა და უკრაინას შორის არსებულ მეგობრულ ურთიერთობებზე, მჭიდრო თანამშრომლობაზე და პარტნიორობაზე.
საგარეო საქმეთა სამინისტროს ინფორმაციით, საქართველოს ელჩმა უკრაინულ მხარეს მადლობა გადაუხადა საქართველოს სუვერენიტეტისა და ტერიტორიული მთლიანობის მხარდაჭერისათვის. თავის მხრივ უკრაინის საგარეო საქმეთა მინისტრის მოადგილემ საქართველოსა და უკრაინას შორის ორივე ქვეყნისთვის საკეთილდღეო ურთიერთობების კიდევ უფრო გაღრმავების სურვილი გამოთქვა.
შეხვედრაზე მხარეებმა გამოხატეს მზაობა, ხელი შეუწყონ ქვეყნებს შორის აქტიურ პოლიტიკურ დიალოგს და გააძლიერონ თანამშრომლობა სხვადასხვა სფეროებში. გარდა ამისა, განხილული იქნა ორმხრივი და მრავალმხრივი თანამშრომლობის აქტუალური საკითხები.