პოლიტიკა
უმჯობესია, თეა წულუკიანმა, რადგან ასეთი გულწრფელია და სხვის შეცდომებს ხედავს, გარეთ იყოს და გარედან მიგვანიშნოს შეცდომებზე - დავით ჭიჭინაძე
საპარლამენტო უმრავლესობის წევრმა დავით ჭიჭინაძემ თეა წულუკიანი ხორავას ქუჩაზე მოზარდების მკვლელობის საქმეზე ტელეკომპანია „იმედზე“ გაკეთებული განცხადების გამო გააკრიტიკა. დეპუტატის თქმით, უმჯობესია, რომ წულუკიანი აღარ იყოს სამთავრობო გუნდში.
„პრემიერ-მინისტრის გადასაწყვეტია, იქნება თუ არა ახალ სამთავრობო კაბინეტში თეა წულუკიანი. ჩემთვის საკმაოდ მიუღებელი იყო მის მიერ ორი დღის წინ ეთერში გაკეთებული განცხადება, რომ თითქოს ვიღაცას რაღაც შეეშალა. უმჯობესია, ასეთი ადამიანი, რადგან ასეთი გულწრფელია და სხვის შეცდომებს ხედავს, გარეთ იყოს და გარედან მიგვანიშნოს შეცდომებზე“, - განაცხადა ჭიჭინაძემ, რომლის კომენტარსაც ტელეკომპანია „იმედმა“ გაავრცელა.
ცნობისთვის, თეა წულუკიანმა ტვ იმედის გადაცემაში „პირისპირ“ განაცხადა, რომ გამოძიების დაწყებასთან დაკავშირებით ყოფილმა პრემიერ-მინისტრმა გიორგი კვირიკაშვილმა ფაქტობრივი შეცდომა დაუშვა.
„ძიება თავიდან არ დაწყებულა, მე ამას პირველად ვამბობ ღია ეთერში, რომ როდესაც პრემიერ-მინისტრმა კვირიკაშვილმა ეს განცხადება გააკეთა, აქციიდან დაბრუნების შემდეგ, მან დაუშვა, სამწუხაროდ, შეცდომა. მე ამას ღიად ვამბობ, სამწუხაროა, რომ ამის თქმა მიწევს, მაგრამ ეს იყო ფაქტობრივი შეცდომა. ძიება არ დაწყებულა თავიდან, თქვენ შეგიძლიათ ყოფილ პრემიერს ჰკითხოთ, ის დაგიდასტურებთ, რომ ეს იყო ფაქტობრივი შეცდომა“, -დასძინა წულუკიანმა.